Mñă kơ hdră hiu čhưn ênguê ară anei jing mđĭ kyar mtah lehanăb hơĭt kjăp, kyuânăn brei bi mguôp hdră logistics hlăm êlan phiơr – hiu čhưn ênguê – anôk truh brei ba yua dŭm asăp hưn mthâo, mâo tur knơ̆ng, mta phŭn lehanăn yuôm bhăn jing mjing dŭm hdră hiu čhưn ênguê jăk, ba wĭt “Klei jăk yâo hlăm ai tiê”, čiăng kơ phung tuê hiu čhưn ênguê ala tač êngao khăp čiăng lehanăn srăng lŏ hriê ti Việt Nam. Snăn, hiu čhưn ênguê Việt Nam si srăng ngă čiăng ba wĭt klei jăk yâo hlăm ai tiê phung tuê hiu čhưn ênguê? Anei jing bruă brei mâo hdră êlan hluê ngă mrâo kñăm jak iêu lu phung tuê hiu čhưn ala tač êngao truh ti Việt Nam lu hĭn mơ̆ng Nai prŏng Võ Trí Thành, Khua knơ̆ng ksiêm hriăm kơ hdră êlan phŭn kơ anăn knăl lehanăn ai bi ktưn.

Hiu čhưn ênguê Việt Nam hŏng dŭm anăn knăl čiăng mđĭ kyar bruă hiu čhưn ênguê, anăn jing tui ksiêm, ksiêm dlăng, dưn yua lehanăn đru mguôp kơ êpul êya. Kyua anăn, bruă mâo tinei jing hiu čhưn ênguê Việt Nam si srăng ngă, si srăng mă bruă čiăng mjing klei jăk yâo hlăm ai tiê phung tuê hiu čhưn, čiăng dưi đĭ kyar hơĭt kjăp hĭn, Anei jing mta phŭn bruă hiu čhưn ênguê ba wĭt, klei găl, djŏ guôp lehanăn hnơ̆ng tŭ jăk hdră hiu čhưn.

Sa ai hŏng klei mĭn anei, Vũ Quốc Trí, Khua knơ̆ng hlăm Êpul hgŭm bruă hiu čhưn ênguê Việt Nam, tơdah hdră ngă mơ̆ng pruê̆ blŭ bruă hiu čhưn ênguê Việt Nam jing Timeless Charm (Klei siam lă lar):

Hdră ngă brei mâo klei kreh knhâo msĕ si hdră ngă bruă mơ̆ng ala tač êngao. Pruê̆ blŭ ăt dưi krơ̆ng kjăp (Việt Nam klei siam lă lar), ƀiădah hdră hưn mthâo brei ngă jăk hĭn. Kâo lač snei, klei yuôm bhăn mơ̆ng buă čih mkra anăn knăl jing jak iêu tuê ala tač êngao hriê čhưn, kyua anăn amâo dưi klei Yuăn ôh. Klei mĭn mơ̆ng hmei jing klei siam mơ̆ng Việt Nam gơ̆ ñu siam êlâo adih, ară anei lehanăn êdei anăp ăt siam. Anei jing klei siam amâo wưng kčah ôh. Amâo djŏ kơ hnơ̆ng, kơ ênoh ƀiădah klei tŭ jăk ăt dôk nanao.

Bi Nguyễn Ngọc Bích - Khua Rustic Hospitality Group, Khua anôk bruă mlih mrâo hdră hiu čhưn ênguê Thụy Sĩ kyua klei đĭ kyar hơĭt kjăp lač snei, klei thâo leh lu thŭn ngă bruă hiu čhưn ênguê brei ƀuh, čiăng đĭ kyar bruă hiu čhưn ênguê snăn anôk bruă duh mkra brei mâo klei bi hgŭm kjăp “Hrăm mbĭt nao kbưi hĭn” bi hrô kơ klei “Hlei ktang hlei ngă” msĕ ară anei.

Kâo nao hgŭm hlăm êpul thơ̆ng kơ bruă mđĭ kyar hdră hiu čhưn ênguê mtah mơ̆ng Mekong-startup, snăn kâo ƀuh drei mâo leh lu hdră msir ƀiădah knŏng jing hdră msir mơ̆ng dŭm anôk bruă duh mkra. Bruă jing si srăng ngă drei bi mguôp dŭm hdră msir anăn, mjing sa hdră msir kluôm kơ êpul êya mđĭ kyar mtah, jing hdră hiu čhưn ênguê mtah, đĭ kyar bruă duh mkra mtah mơ̆ng Việt Nam.

Mñă klă bruă klam mơ̆ng anôk bruă duh mkra êlan phiơr hlăm hdră logistics,  Lê Tuấn Anh, Khua anôk bruă kriê dlăng hdră hiu čhưn ênguê lehanăn Boh hră, klei blŭ Ala tač êngao, Sang hră gưl prŏng bruă Dhar kreh Hà Nội brei thâo:

Tuê hiu čhưn ênguê ala tač êngao truh ti Việt Nam êbeh 80% jing hŏng êlan phiơr. Kyua anăn, hdră hiu čhưn ênguê mguôp hŏng êlan phiơr brei mâo klei bi mguôp kjăp lehanăn mđĭ kyar hĭn. Klei bi mguôp mơ̆ng dŭm tĭng yuôm bhăn snăk. Hdră êlan phiơr ăt jing hdră hưn mthâo yuôm bhăn, kyua phung tuê truh ti Việt Nam kreh hriê mơ̆ng êlan phiơr. Kyua anăn, boh sĭt, pŏk rup mơ̆ng Việt Nam mphŭn mơ̆ng êlan phiơr, snăn êlan phiơr yơh mphŭn kčưm, mjưh ruê̆ lehanăn lŏ hriê, brei drei mđing kơ klei anei.

Hlăk mâo lu ala čar dôk bi ktưn čiăng jak iêu phung tuê hiu čhưn ênguê ala tač êngao, snăn Việt Nam dôk gĭr ba yua hdră êlan phiơr lehanăn hdră hiu čhưn ênguê mâo mta phŭn hluê hdră tar rŏng lăn. Bruă mđĭ lehanăn bi mklă anăn knăl hiu čhưn ênguê Việt Nam hlăm tar rŏng lăn, ba yua jih klei găl mâo mơ̆ng êlan phiơr, hŏng hnơ̆ng trah dlăng Việt Nam jing sa anôk bruă logistics jăk găl leh tač êdeh phiơr Long Thành ngă leh hlăm thŭn 2025, dŭm anôk bruă duh mkra Việt Nam thâo bi hgŭm mbĭt čiăng mđĭ kyar bruă hiu čhưn êguê mtah – hŏng dŭm anôk truh êđăp ênang, jĕ giăm, srăng mjing klei yâo mơak kơ phung tuê ala tač êngao truh ti Việt Nam lehanăn srăng lŏ mâo lu phung tuê hriê čhưn ti Việt Nam./.