VOV4.Êđê- Aguah hruê 11/2, ti Hà Nội, Phŭn bruă Lŏ hma mkŏ mjing leh Klei bi kƀĭn online kluôm ala kơ hdră gang mkhư̆ klei ruă tưp ti mnơ̆ng rông lehanăn mnơ̆ng hlăm êa thŭn 2022. Thŭn 2021, dŭm mta mnơ̆ng mkra mơ̆ng mnơ̆ng rông đĭ êbeh 4% mkă hŏng thŭn 2020, ƀiădah klei ruă tưp bluh mâo lu hlăm thŭn êgao ngă luič liê hlăm bruă duh mkra êbeh 2.500 êklai prăk. Phŭn bruă Lŏ hma ăt mkăp kơ dŭm alŭ wăl dŭm pluh êbâo hnơ̆ng vaccine lehanăn dŭm mta hóa chất gang mkhư̆ klei ruă tưp ti mnơ̆ng rông, mnơ̆ng hlăm êa. Hluê si klei bi mklă, thŭn 2022, klei ruă tưp ti mnơ̆ng rông, mnơ̆ng hlăm êa ăt dôk ti hnơ̆ng lu. Kyua anăn, ti anôk bi kƀĭn, phung bi ala trông čhai leh kơ bruă pŏk hdră ksiêm dlăng dŭm klei ruă huĭ hyưt ti mnơ̆ng rông, mnơ̆ng hlăm êa kñăm mjing klei găl hlăm bruă lŏ rông mrâo, mđĭ êpul mnơ̆ng rông, rơ̆ng mkăp djăp mnơ̆ng dhơ̆ng hlăm ala čar lehanăn ba čhĭ kơ ala tač êngao./.

Pô mblang: Y-Khem Niê