Klei bi kƀĭn mâo klei hgŭm mơ̆ng êbeh 150 čô bi ala jing phung bi ala kơ dŭm anôk bruă kriê dlăng knŭk kna, êpul hgŭm bruă leh anăn anôk bruă duh mkra. Hlăm klei bi kƀĭn, phung bi ala kƀĭn kơ klei ksiêm hriăm msĕ si “Mkŏ mjing anăn knăl” - klei dleh dlan kơ bruă mdiê braih Việt Nam, mkŏ mjing anăn knăl ala čar kơ braih Việt Nam - “Klei lông dlăng leh anăn klei găl”. Êngao anăn, phung thơ̆ng kơ bruă lŏ hma, dŭm anôk bruă mkra mjing leh anăn mnia blei mơ̆ng bruă mdiê braih ăt mâo leh mơh lu klei đru mguôp yuôm bhăn, hdră msir kñăm mkŏ mjing tŭ jing anăn knăl ala čar kơ braih Việt Nam.

Hdră kñăm Klei bi kƀĭn jing mjing sa klei bi kƀĭn pŏk, iêô mthưr klei hgŭm mơ̆ng phung thơ̆ng kơ bruă mrô sa, jing anôk  bruă duh mkra leh anăn phung kriê dlăng mâo lu klei thâo, čiăng mâo klei kčĕ klă sĭt, đru mkŏ mjing anăn knăl braih Việt Nam ƀrư̆ kjăp ktang hlăm anôk ba čhĭ ala tač êngao.