Mprăp đru kơ klei blei ba yua Tết mơ̆ng mnuih ƀuôn sang, knơ̆ng bruă duh mkra mnia mblei Ƀêñ mứt kẹo Hà Nội (Hanobaco) mprăp leh mnơ̆ng dhơ̆ng tết thŭn 2025 mơ̆ng krah thŭn êlâo. Hluê anăn, hnơ̆ng kơ mứt tết, ƀêñ kẹo tết…đĭ 10%, hŏng giăm 350 tôn mứt, 100 tôn kẹo. Hrăm mbĭt hŏng phung blei ba yua, anôk bruă ba mdah lu mta mnơ̆ng dhơ̆ng hlăm wưng tết hŏng hnơ̆ng tŭ jăk leh anăn ênoh djŏ, lu jơr. Lê Ngọc Huy, khua adŭ bruă mnia mblei mơ̆ng knơ̆ng bruă brei thâo, hlăm bruă mkra mjing, knơ̆ng bruă ngă kjăp dŭm klei čuăn kơ klei doh êƀăt, ba mnơ̆ng dhơ̆ng tŭ jăk hĭn kơ phung blei ba yua. Mbĭt hŏng anăn, mnơ̆ng dhơ̆ng tết ăt mâo knơ̆ng bruă mđing kơ mnâo mnañ mơ̆ng grăp krĭng wăl.

Hmei mâo dŭm mta mnơ̆ng dhơ̆ng mrâo mrang hĭn amâodah bi kƀĭn mbĭt mơ̆ng 3 krĭng kwar. Anăn jing dŭm tŏ mứt mâo hmei ba hlăm dŭm mnơ̆ng dhơ̆ng 3 krĭng kwar Dưr – Krah – Dhŭng mâo mta mưt 12 mnâo mnañ, êngao kơ dŭm mnâo mnañ phŭn msĕ si êtak lăn, êya, carôt… mâo dŭm mñâo mkăn msĕ si boh hluăt, boh khiêt, kneh, durian… hluê anăn čiăng ba klei lu jơr kơ phung ƀơ̆ng, ăt msĕ klei lu jơr kơ mnơ̆ng dhơ̆ng čiăng kơ phung blei ba yua mâo thiăm klei ruah.

Hlăm wưng anei, lu knơ̆ng bruă mkra mjing mnơ̆ng ƀơ̆ng huă ăt mprăp ênŭm mnơ̆ng dhơ̆ng mkăp brei, đru hlăm wưng tết mơ̆ng mnuih ƀuôn sang. Trương Mạnh Linh, khua gĭt gai bruă mkra mjing braih mơ̆ng Êpul Grŭp Tân Lŏng brei thâo, wưng anei bŏ leh klei kuôl kă blei mnơ̆ng hlăm wưng tlâo mlan tal 1/2025. Êngao kơ klei ba čhĭ, knơ̆ng bruă ăt mprăp braih đru hlăm wưng Tết Nguyên đán, hŏng hnơ̆ng ăt đĭ hluê si grăp thŭn leh anăn mâo leh hdră êlan mkăm pioh rơ̆ng kơ hnơ̆ng tŭ jăk hĭn đru kơ phung blei ba yua drông tết Ất Tỵ 2025:

Hmei mkăm pioh nanao mnơ̆ng dhơ̆ng čiăng bi mâo djăp klei blei ba yua hlăm lăn čar, hŏng klei bhu hrô leh anăn pioh briah hlăm anôk êđăp čiăng rơ̆ng hnơ̆ng tŭ jăk braih sui hĭn kơ anôk mnia mblei hlăm lăn čar, rơ̆ng kơ klei čiăng hlăm wưng Tết.

Čiăng rơ̆ng kơ klei blei yua prŏng hĭn hlăm thŭn, dŭm anôk bruă mkăp brei mnơ̆ng ƀơ̆ng čiăng êdi mâo leh hdră êlan mkra mjing mnơ̆ng dhơ̆ng. Dŭm anôk mkăp brei mnơ̆ng dhơ̆ng čŏng mkŏ, ba yua boh mnga bruă lŏ hma, mnơ̆ng ƀơ̆ng, dŭm mta mnơ̆ng dhơ̆ng knhuah gru mơ̆ng dŭm čar, bi lu jơr mta mnơ̆ng (mđing tal êlâo hŏng mnơ̆ng Việt Nam) đru kơ anôk mnia mblei wưng knhal jih thŭn, êlâo, hlăm leh anăn êdei Tết. Trương Sỹ Bá, Khua kiă kriê knơ̆ng bruă duh mkra mnia mblei boh mnga bruă lŏ hma BAF Việt Nam brei thâo, hŏng dŭm mta kđeh čĭm ŭn, knơ̆ng bruă mâo klei mprăp klă, mđĭ ênoh rông hnưm čiăng bi djăp ênŭm klei čiăng mơ̆ng phung blei ba yua hlăm wưng Tết Nguyên đán 2025:

Tết thŭn anei hmei dưi ba kơ anôk mnia mblei mơ̆ng 1,1 – 1,2 êklăk drei, hŏng hnơ̆ng đĭ 2 blư̆. Mbĭt hŏng klei đĭ ênoh rông mơ̆ng knơ̆ng bruă ăt msĕ mơh dŭm knơ̆ng bruă rông mnơ̆ng mkăn, srăng đru mđĭ klei mkăp brei ŭn hlăm anôk mnia mblei… mơ̆ng anăn dưi bi mâo djăp klei čiăng mơ̆ng phung blei ba yua.

Hluê si Nguyễn Kiều Oanh, k’iăng khua knơ̆ng bruă tuh tia Hà Nội, wưng tết anei ƀuôn prŏng mâo leh klei mprăp klei mkăp brei mnơ̆ng dhơ̆ng, ăt msĕ mơh dŭm mta mnơ̆ng tŭ jăk đru kơ mnuih ƀuôn sang hlăm ƀuôn prŏng – mơ̆ng êlâo kơ tết 3 mlan. Mbĭt hŏng anăn, mkŏ mjing lu anôk čhĭ rơ̆ng djăp ênŭm mnơ̆ng dhơ̆ng, ênoh ênil hơĭt đru kơ mnuih ƀuôn sang, mkŏ mjing hdră mtrŭn ênoh čiăng mtrŭt mđĭ klei blei ba yua, amâo brei truh klei kƀah mnơ̆ng mnơ̆ng ngă bi mđĭ ênoh:

Hmei mă bruă hŏng dŭm anôk mkăp brei ăt msĕ mơh gŏ sang mnia mblei čhĭ hliê, dŭm anôk čhĭ mnia čiăng thâo klă klei čiăng leh anăn mnơ̆ng dhơ̆ng mkăp brei kơ mnuih ƀuôn sang hlăm wưng tết thŭn anei. Hmei ăt mñă klă srăng ngă jăk bruă klam pô amâo mâo brei kƀah hin mnơ̆ng dhơ̆ng, ăt msĕ mơh mnơ̆ng dhơ̆ng ti Hà Nội dưi rơ̆ng hnơ̆ng tŭ jăk.

Čiăng rơ̆ng bi kna klei čiăng klei mkăp brei mnơ̆ng čiăng êdi, bi hơĭt ênoh mnơ̆ng dhơ̆ng wưng Tết Nguyên đán Ất Tỵ 2025, Phŭn bruă tuh tia mñă kơ knơ̆ng bruă tuh tia dŭm čar, ƀuôn prŏng gưl dlông ktuê dlăng anôk mnia mblei, klei mkăp brei mnơ̆ng dhơ̆ng čiăng êdi, čŏng pô mâo hdră êlan amâodah hưn mdah hŏng dŭm anôk bruă djŏ tuôm čiăng rơ̆ng klei hơĭt anôk mnia mblei, amâo mâo brei mâo klei kƀah hin mnơ̆ng dhơ̆ng, mđĭ ênoh mnơ̆ng dhơ̆ng hlăm wưng knhal jih thŭn leh anăn Tết Nguyên đán

Mbĭt hŏng anăn, čŏng pô mkăp brei mnơ̆ng dhơ̆ng, mkăm pioh mnơ̆ng čiăng êdi hlăm wưng tết, hluê ngă hdră êlan bi hơĭt ênoh hluê si klei čuăn mơ̆ng hdră bhiăn lăn čar. Mbĭt anăn, mtrŭt mđĭ bruă hluê ngă klei mtrŭt mjhar “Mnuih ƀuôn sang mđing yua mnơ̆ng Việt Nam ”, hdră ba mnơ̆ng Việt Nam kơ krĭng ƀuôn sang, truh kơ wăl anôk bruă tuh tia bi mguôp hŏng dŭm knăm mnia mblei, bi mtrŭn ênoh, mtrŭt mđĭ klei blei ba yua. Mđĭ hĭn bruă ksiêm dlăng, ktuê dlăng anôk mnia mblei, ksiêm dlăng kơ ênoh ênil, hnơ̆ng tŭ jăk mnơ̆ng dhơ̆ng, dŭm klei čuăn kơ klei doh êbăt, klei mkăm pioh mnơ̆ng dhơ̆ng čiăng mđĭ ênoh./.