VOV4.Êđê- Kñăm rơ̆ng boh tŭ hlăm klei ngă bruă, mđĭ hnơ̆ng bruă lŏ hma hlăm wưng klei hmăi amâo jăk mơ̆ng klei ruă tưp Covid-19, čar Lâm Đồng dôk kñăm mtrŭt mđĭ bruă bi mguôp klei ngă bruă, mkra mjing leh anăn ba čhĭ boh mnga bruă lŏ hma. Čar Lâm Đồng ară anei mâo êbeh 180 klei bi mguôp ngă bruă knuă nao mbĭt hŏng bruă ba čhĭ dŭm mta boh mnga bruă lŏ hma hŏng giăm 18.400 gŏ sang ƀĭng ngă lŏ hma nao hgŭm. Kyua klei bi mguôp anei, 520 êbâo tôn boh mnga bruă lŏ hma dŭm mta mơ̆ng ƀĭng ngă lŏ hma mâo anôk ba čhĭ hơĭt hlăm thŭn. Čar Lâm Đồng mdưm leh hnơ̆ng čoh čuăn mđĭ hĭn ênoh klei bi mguôp jing 200 hlăm thŭn anei, hŏng klei nao hgŭm mơ̆ng êbeh 20.000 gŏ sang ƀĭng ngă lŏ hma leh anăn hnơ̆ng boh mnga bruă lŏ hma ba čhĭ mâo êbeh 600.000 tôn. Čiăng dưi mâo mta kñăm anei, čar srăng kñăm kơ lu hdră êlan đru mđĭ kyar dŭm klei bi hmô êpul bi mguôp, knơ̆ng bruă điêt leh anăn man dưn, lŏ đru kơ ƀĭng ngă lŏ hma dưn yua dŭm hdră ngă bruă mrâo mrang, mđĭ hnơ̆ng tŭ jăk leh anăn boh mnga bruă lŏ hma.

Pô mblang: Y-Ƀel Êban