Dŭm mlan hŏng anei, êbeh 700 hộ gŏ êsei mnuih ƀuôn sang Dao ti alŭ Đoàn Kết, să Ia Piơr, kdriêk knông lăn Čư̆ Prông hdĭp hlăm anôk bŏ hŏng mnâo ƀâo brŭ snăk sơưn mơ̆ng 3 bĭt anôk rông ŭn mrâo pŏk. Hoàng Văn Niên, ti alŭ Đoàn Kết brei thâo, mơ̆ng tlam truh mmăt mlam mnâo ƀâo brŭ ktang êdi, mnuih ƀuôn sang knŏng thâo kđăl ƀăng yơh, amâodah truă čhiăm guôm ƀô̆, tơl wăt pĭt đih guôm ƀô̆ mơh.

        Ară anei ti să Ia Piơr mâo leh 14 anôk rông mnơ̆ng dôk rông lehanăn dôk rŭ mkra anôk rông. Mâo sa bi knông mbĭt jing să Ia Lâu mâo truh 19 bĭt anôk rông ŭn. Hoàng Văn Niên dôk hnĭng kơ klei hdĭp pô êjai jih jang anôk anăn hlŏng bi rông hĕ ŭn sơăi:

“Phung rông ŭn êlâo kơ rŭ mkra anôk rông ŭn diñu bi lač mkra jih anôk mkhư mnâo, amâo srăng mâo mnâo bâo brŭ ôh, lehanăn srăng mjing bruă knuă mă kơ mnuih ƀuôn sang. Ƀiădah truh kơ ară anei amâo mâo ƀuh iêo mnuih ƀuôn sang muưt mă bruă ôh, ƀiădah knŏng dôk bi hrip ƀâo brŭ mơ̆ưng diñu. Ară anei mrâo mâo dŭm anăn anôk rông ŭn mrâo pŏk, mgi dih amâo mâo thâo ôh si srăng jing tơdah lu anôk srăng lŏ pŏk mơh, snăn amâo mâo thâo ôh si mnuih ƀuôn sang srăng hdĭp?”

         Leh hmư̆ klei mnuih ƀuôn sang hưn, akŏ mlan 4/2023, knơ̆ng bruă sang čư̆ êa să Ia Piơr mâo leh mmông mă bruă hŏng 3 bĭt anôk leh rông ŭn. Hlăm hră mơar mă bruă čih klă: Jih jang bruă mkhư̆ eh ŭn ka ngă leh ênŭm, ƀiădah anôk anei rông leh ŭn mâo 3 mlan hŏng anei leh, rông dŭm pluh êbâo drei ŭn pioh mă kđeh. Bùi Văn Phụng - Khua bruă Đảng să Ia Piơr brei thâo:

“Akâo kơ nah dlông mđing leh dŭm anôk rông ŭn anei mkra bi leh hdră mkhư̆ eh ŭn, snăn mkŏ mjing êpul nao ksiêm, mkă tĭng bi nik djăp ênoh čuăn dưi mkhư eh ŭn kơh brei rông. Msĕ si ară anei, gưl bruă Đảng lehanăn bruă sang čư̆ êa alŭ wăl dleh dlan mă bruă, kyuadah tal êlâo să amâo mâo bruă truăn kơ klei anei ôh, lehanăn lĕ să kăn djăp klei dưi mghaih msir rei”.

        Ară anei kluôm čar Gia Lai mâo truh 46 êpul bruă mâo hdră êlan čiăng rŭ mjing anôk rông ŭn, mâo leh klei dưi brei rŭ mjing. Bruă bi kluh pŏk anôk rông ŭn, ngă truh lu klei amâo mâo djŏ, leh nao ksiêm hlăk knhal jih thŭn dih. Hlue anăn leh jih jang bruă rŭ mjing anôk rông ŭn, ƀiădah amâo mâo djăp ôh ênoh čuăn mă bruă, msĕ si kƀah anôk mkra mjing mnơ̆ng ƀơ̆ng kơ ŭn, lehanăn amâo mâo ôh anôk mđam eh ŭn djăp hŏng ênoh čuăn. Mơ̆ng anăn mơh ƀuh jih jang bruă ngă anei amâo mâo klei tuư dưn ôh hŏng hdră êlan mkŏ mjing anei, lehanăn ka dưi duah brei leh bruă mă kơ mnuih ƀuôn sang hlăm alŭ wăl anei.

         Mbĭt hŏng anăn, mâo leh đa đa bruă dưi mâo klei ênưih hlăm bruă rŭ mkra, ƀiădah leh rŭ mdơ̆ng anôk rông lŏ brei pô mkăn mưn ngă. Lehanăn lu anôk rŭ mkra ka djăp ôh ênoh čuăn doh, ƀiădah ruăt rông ŭn yơh. Ƀuh lu snăk knŏng rŭ mkra anôk krư̆ ŭn đuič, amâo mâo mkra ôh anôk mkhư̆ êa djah lehanăn eh ŭn.

        Mâo lu anôk rŭ mkra anôk rông prŏng snăn rông truh êbeh 43.000 drei ŭn, dưi ba čhĭ dŭm pluh êbâo tôn kđeh čĭm ŭn hlăm grăp thŭn. Khădah knŏng mâo truh jiă kơ bruă sang čư̆ êa čar Gia Lai 17 êklai prăk đuič, lu jing knŏng prăk jia mưn yua lăn lehanăn dŭm ênoh bi liê mkăn.

        Kñăm mghaih msir jih jang klei awăt kƀah anei, knơ̆ng bruă sang čư̆ êa čar Gia Lai mâo hră mtrŭn kơ dŭm knơ̆ng bruă čuăl mkă duh bi liê mâo klei bi mguôp hŏng dŭm knơ̆ng dhar bruă djŏ tuôm ti alŭ wăl ktrâo atăt phung duh mkra ngă bi djŏ tui si hdră mtrŭn, djŏ hŏng hdră êlan duh mkra doh, bi răng mgang wăl hdĭp mda, lehanăn tuh jia bi ênŭm djŏ hŏng klei ƀuăn hlăm hdră êlan mă bruă. Đinh Hữu Hoà - K’iăng khua kiă kriê bruă čuăl mkă duh bi liê čar Gia Lai brei thâo:

“Hŏng bruă rông mnơ̆ng, knơ̆ng bruă čuăl mkă duh bi liê kčĕ leh kơ knơ̆ng bruă sang čư̆ êa čar brei mđing bi kjăp hŏng dŭm bruă duh bi liê, boh nik jing dŭm mta bruă prŏng hlăm klei rông mnơ̆ng, brei thâo ba yua kdrăp mrâo mrang, rơ̆ng bi mdoh wăl hdĭp mda, lehanăn mâo mbĭt hŏng dŭm bruă mkăn msĕ si bruă mkra mjing mnơ̆ng mơ̆ng anôk rông mnơ̆ng, kñăm lŏ mđĭ hĭn klei tŭ dưn mâo ba wĭt, ka thâo iêo jak ôh dŭm bruă duh mkra điêt mkăn, lehanăn jih jang kdrăp dôk mă bruă ară anei jing dŏ hđăp leh, amâo lŏ guôp ôh hŏng ênuk ară anei”.

Klei rông mnơ̆ng ba klei čhŏ djhan kơ wăl hdĭp mda amâo mâo djŏ knŏng ti čar Gia Lai ƀiădah klei msĕ snăn dôk mâo lu hlăm dŭm alŭ wăl mkăn hlăm Lăn Dap Kngư. Msĕ si ti kdriêk Čư̆ Jŭt, čar Daknông mâo truh 37 anôk rông ŭn prŏng. Hlăm anăn lu anôk rông ba klei čhŏ djhan prŏng êdi kơ wăl hdĭp mda, hmăi leh amâo mâo jăk ôh hŏng klei hdĭp mnuih ƀuôn sang jŭm gah găn. Msĕ si anôk rôn gŭn mơ̆ng Lê Văn Hùng, ti alŭ Nam Tiến, să Ea Pô, kdriêk Čư̆ Jŭt jing anôk rông truh 2.400 drei ŭn pioh mă kđeh. Êjai hlăm klei rông, anôk rông ŭn anei tuh mđuĕ êa djah kơ êngao, doh hŏng klei bhiăn dưi brei. Mơ̆ng anăn, knơ̆ng bruă sang čư̆ êa čar Daknông mâo leh klei dŭ bi kmhal anôk rông ŭn anei truh 347 êklăk 500 êbâo prăk. Êngao kơ đŭ hŏng prăk, knơ̆ng bruă sang čư̆ êa čar lŏ mgô̆ anôk rông ŭn anei lŏ mkra jih anôk mkhư̆ bi mdoh djah djâo, rŭ mkra bi djŏ hŏng ênoh čuăn klei čuăl mkă./.