VOV4.Êđê- Mñă klă ti anôk bi kƀĭn phung čih klei mrâo 3 mlan gưl 3 lehanăn hưn mthâo kơ hdră kčah mtrŭt mđĭ bruă duh mkra mnia mblei dŭm mlan knhal jih thŭn 2021 lehanăn tă hdră hlăm thŭn 2022 mkŏ mjing aguah hruê 5/10 ti Hà Nội, K’iăng khua phŭn bruă Lŏ hma mđĭ kyar krĭng ƀuôn sang Phùng Đức Tiến brei thâo, bruă rông mnơ̆ng lehanăn mnơ̆ng hlăm êa jing 2 hdră ngă lŏ hma krơ̆ng kjăp hnơ̆ng đĭ kyar hlăm kluôm thŭn anei. 9 mlan êgao, bruă lŏ hma bi mklă jing hdră duh mkra phŭn, krơ̆ng hnơ̆ng đĭ kyar 2,74%; ênoh prăk mnia mblei bruă lŏ hma, mnơ̆ng hlăm êa đăo tĭng mâo 35,5 êklai đolar Mi, đĭ 17,7%. Kñăm rơ̆ng kjăp hdră mkăp mnơ̆ng dhơ̆ng hlăm dŭm mlan knhal jih thŭn, boh nik Têt Nguyên đán Nhâm dần 2022 lehanăn mkăp kơ hdră ba čhĭ kơ ala tač êngao, anôk bruă lŏ hma bi mklă leh 4 hdră msir phŭn. Hluê anăn, mđing pla mjing, mnia mblei djŏ guôp hŏng klei găl mơ̆ng lăn ala, yan adiê, klei mâo mơ̆ng klei ruă Covid 19 ti grăp čar, ƀuôn prŏng, ruh mtlaih klei dleh dlan mtrŭt mđĭ hdră mnia mblei mjing klei găl kơ bruă hrui blei hlăm ala čar lehanăn mtrŭt mđĭ hdră ba čhĭ kơ ala tač êngao. Mbĭt anăn mđĭ hdră mdrơ̆ng hŏng klei yan adiê ngă tŭ dưn./.

Pô mblang: H’Nêč Êñuôl