VOV4.Êđê -  Tlam mbruê, bruă sang čư̆ êa bm Ƀuôn Ama Thuôt ba dah leh hră mtrŭn mjêč, gĭt gai kơ dŭm să, ƀuôn hgŭm hyuă kjăp dŭm hdră êlan gang mkhư̆ klei ruă tưp kñăm mdrơ̆ng hŏng ênoh mnuih ruă đĭ lu hlăm yang ƀuôn. Hluê anăn, ƀuôn prŏng mtă brei mdei êjai dŭm bruă ngă: Anôk kdŏ mmuñ, Karaoke, sang ƀar, sang massage, internet, anôk hlăp game, sang khăt ƀŭk, bi msiam asei mlei, anôk hlăp lêñ kơ phung hđeh, tač mjuăt asei mlei, dŭm anôk čŏng mnia mblei, čhĭ mnia djiêu êlan, hră mrô, klei kƀĭn kkuh mpŭ hlăm dŭm sang kkuh mpŭ, đăo knang, dŭm bruă dhar kreh, hlăp mblul hlăm yang ƀuôn leh anăn dŭm anôk bruă mjuăt asei mlei hlăm sang.

Bi kơ dŭm anôk mnia mblei mnơ̆ng ƀơ̆ng huă msĕ si sang huă mnăm, sang mnăm kphê, dưi čhĭ mnia sa anôk ƀiădah rơ̆ng dŭm hdră êlan gang mkhư̆ klei ruă tưp. Hlăm hruê mbruê ƀuôn prŏng Ƀuôn Ama Thuôt mâo 30 čô mâo klei ruă tưp Covid-19, hlăm anăn mâo 12 čô hlăm êpul êya yang ƀuôn. Ƀuôn prŏng dôk ngă hdră tui duah, mă mta test pral hlăm brô 4.000 čô ti ƀuôn Kŏ Siêr, ƀuôn hgŭm Tân Lâp čiăngb hmar mbĕ đuê̆ ba mdrao jih F0 hlăm yang ƀuôn, mkhư̆ klei ruă tưp. Hlăm kluôm čar Dak Lak, hruê mbruê mâo 92 čô mâo klei ruă tưp Covid-19. Anei jing ênoh mnuih ruă lu hĭn mơ̆ng êlâo truh kơ ară anei.

Y Ƀel pô mblang