VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19 kyua hmao ƀuh lu mnuih ruă hlăm êpul êya, tlam hruê 24/10, Anôk bruă sang čư̆ êa ƀuôn prŏng Ƀuôn Ama Thuôt, čar Dak Lak mtrŭn leh hră m’ar mtă dŭm anôk čhĭ mnơ̆ng ƀơ̆ng (Sang čhĭ mnơ̆ng ƀơ̆ng huă, anôk čhĭ mnơ̆ng ƀơ̆ng, anôk čhĭ kphê) mdei hdră čhĭ mnơ̆ng hlŏng dôk ƀơ̆ng huă. Wưng ba yua mơ̆ng 6h hruê 25/10 truh kơ jih hruê 10/11/2021. Êlâo anăn, hruê 21/10, Anôk bruă sang čư̆ êa ƀuôn prŏng Ƀuôn Ama Thuôt mâo leh hră m’ar mjêč kñăm mđĭ hĭn hdră mdrơ̆ng hŏng klei ruă Covid 19.

Snăn, hlăm wang 3 hruê êgao, Anôk bruă sang čư̆ êa ƀuôn prŏng Ƀuôn Ama Thuôt ba mtrŭn leh dŭm hră m’ar mkra mlih klei kčah mtrŭn hlăm bruă čhĭ mnơ̆ng dhơ̆ng yua kñăm mđĭ hĭn hdră gang mkhư̆, mdrơ̆ng hŏng klei ruă Covid 19 ti alŭ wăl ƀuôn prŏng. Ti Dak Lak, hlăm 24h êgao, tĭng mơ̆ng 4h hruê 23/10 truh kơ 4h hruê 24/10, kluôm čar mâo 93 čô djŏ kman Sar CoV2, wăl krah Ƀuôn Hô mâo ênoh mnuih ruă lu hĭn truh 50 čô, Čư̆ Mgar 19 čô, ƀuôn prŏng Ƀuôn Ama Thuôt 13 čô, kdriêk Čư̆ Kuiñ 11 čô./.

Pô mblang: H’Nêč Êñuôl