VOV4.Êđê- Tlam hruê 1/10, hlăm klei bi kƀĭn mơ̆ng Anôk bruă gĭt gai gang mkhư̆ klei ruă Covid-19 ƀuôn prŏng Hồ Chí Minh, kahan ksiêm ƀuôn prŏng brei thâo, msir mgaih leh kơ hlăm brô 1.300 čô mnuih ƀuôn sang dưi wĭt kơ ƀuôn hlăm aguah 1/10. Ti anăp boh klei mnuih ƀuôn sang bi kluh găn dŭm anôk gak răng ti dŭm ktuê êlan ƀuôn prŏng, êpul kahan ksiêm bi hgŭm hŏng dŭm knơ̆ng bruă bi kčaĭ asăp hâo hưn, iêu jak mnuih ƀuôn sang lŏ kplăk wĭt leh anăn hluê ngă 5K rơ̆ng klei mtă kơ bruă mdrao mgŭn. Leh ngă bruă, mnuih ƀuôn sang ăt čang hmang dưi wĭt kơ ƀuôn sang anăn kahan ksiêm bi hgŭm hŏng Knơ̆ng bruă êlan klông dŭ mdiăng, Knơ̆ng bruă mdrao mgŭn, Phŭn bruă kahan ksiêm ƀuôn prŏng čiăng mbha dŭm êpul  hluê si grăp krĭng wăl hjăn, mbha hră čih klei hâo hưn. Leh čih djăp klei hâo hưn leh anăn bi trông hŏng dŭm anôk bruă dăp êdeh mdiăng mnuih leh anăn êdeh êdâo, kahan ksiêm ƀuôn prŏng atăt êlan ba mnuih ƀuôn sang kơ kahan ksiêm alŭ wăl tŭ jum. Dưi thâo, hlăm gưl klei ruă tưp mrâo êgao, ƀuôn prŏng Hồ Chí Minh bi hgŭm hŏng dŭm alŭ wăl čiăng ba êbeh 37 êbâo čô mnuih ƀuôn sang wĭt kơ ƀuôn sang.

Pô mblang: H’Zawut Ƀuôn Yă