VOV4.Êđê - Anôk bruă gĭt gai gang mkhư̆ klei ruă Covid-19 ƀuôn prŏng Hồ Chí Minh brei thâo, ƀuôn prŏng dôk mprăp sa asăp mtrŭn mrâo čiăng djŏ guôp hŏng boh klei sĭt ti ƀuôn prŏng. Êlâo anăn, hruê 24-9, Khua Knơ̆ng bruă sang čư̆ êa ƀuôn prŏng Hồ Chí Minh Phan Văn Mãi bi klă leh hră mơar mrô 3165 akâo kơ Khua knŭk kna brei ƀuôn prŏng mâo klei kčah mtrŭn hjăn ba yua kơ boh klei mrâo, djŏ guôp hĭn hŏng boh klei ti alŭ wăl. Mĭn tĭng asăp mtrŭn anei srăng dưi mtrŭn leh anăn dưi ba yua mơ̆ng hruê 1/10.

Jih jang klei mprăp srăng tui hluê si klei ktrâo lač mơ̆ng Phŭn bruă mdrao mgŭn. Êngao anăn, ƀuôn prŏng Hồ Chí Minh ăt mtă dưi mđing uêñ vaccin kơ ƀuôn prŏng leh anăn krĭng bruă duh mkra phŭn nah Dhŭng. Kơ bruă mkŏ mjing êrô êbat hlăm boh klei mrâo, Knơ̆ng bruă êlan klông dŭ mdiăng ka mâo ôh hdră êlan klă sĭt brei êrô êbat hlăm ƀuôn prŏng leh anăn mlir krĭng, jing mơ̆ng dŭm čar nao ti ƀuôn prŏng Hồ Chí Minh leh anăn mklăk wĭt.

H Zawut pô mblang