VOV4.Êđê- Aguah hruê 30/9, K’iăng khua anôk bruă sang čư̆ êa ƀuôn prŏng Hồ Chí Minh Lê Hoà Bình hưn mthâo leh Asăp mtrŭn kơ bruă lŏ dơ̆ng ksiêm dlăng, mkra mlih dŭm hdră msir gang mkhư̆ klei ruă Covid 19 lehanăn ƀrư̆ ƀrư̆ lŏ krŭ wĭt bruă duh mkra – ala ƀuôn hlăm alŭ wăl ƀuôn prŏng Hồ Chí Minh.

Hluê si Asăp mtrŭn, mnuih ƀuôn sang tơdah găn êrô hlăm êlan klông brei ba yua mta QR mơ̆ng kdrăp VNEID lehanăn kdrăp ksiêm dlăng hdră mdrao mgŭn ƀuôn prŏng Hồ Chí Minh dưi bi êdah wưng tlŏ leh vaccine, tơdah amâo mâo mta QR, brei mdah dŭm mta hră m’ar msĕ si: F0 hlao leh klei ruă hlăm wang ti gŭ 180 hruê, Tlŏ leh ƀiă êdi 1 aruăt vaccine hlăm ênoh 2 aruăt brei tlŏ hlăm wang ƀiă êdi 14 hruê djŏ hŏng hră mâo bi mklă mơ̆ng anôk rbuă djŏ tuôm. Hluê ngă 5 Asăp mtă, tơdah mâo klei bie edah êngoh, mtŭk, hlơr... brei hưn mthâo hŏng êlan đĭng blŭ mjêč mơ̆ng Êpul bi kdơ̆ng pral hŏng Covid 19 hlăm alŭ wăl amâo dah êlan đĭng blŭ đru dŏng mjêč 115. Boh nik, mnuih ƀuôn sang amâo dưi nao kơ čar, ƀuôn prŏng mkăn, tơdah mâo bruă mjêč brei nao hưn mthâo hŏng anôk bruă djŏ tuôm lehanăn hluê ngă kjăp klei kčah mtrŭn gang mkhư̆ klei ruă tưp./.

Pô mblang: H’Nêč Êñuôl