VOV4.Êđê- Hlăm sa klei hâo hưn mrâo anei mơ̆ng adŭ bruă knŭk kna, k’iăng khua knŭk kna Lê Minh Khái mtă brei hnưm bi leh hdră êlan čiăng đru kơ phung mniê, phung hđeh dleh dlan kyua klei ruă tưp Covid-19. Knŭk kna mtă kơ phŭn bruă mnuih mă bruă, kahan êka êkeh leh anăn yang ƀuôn bi mguôp hŏng dŭm phŭn, dhar bruă djŏ tuôm, mjêč bi leh hră hưn mdah leh anăn hdră mtrŭn mkăp mơ̆ng knŭk kna kơ boh klei anei. Bi kơ hdră êlan đru kơ grăp čô, grăp gŏ sang mâo klei dleh dlan kyua klei ruă tưp Covid-19 wĭt kơ ƀuôn sang pô, dưi lĭng čan hŏng ênoh prăk mnga ƀiă čiăng duh bi liê ngă bruă knuă, mnia mblei. K’iăng khua knŭk kna jao kơ phŭn bruă hdră êlan leh anăn duh bi liê bi mguôp hŏng kơ phŭn bruă mnuih mă bruă, kahan êka êkeh leh anăn yang ƀuôn, knơ̆ng bruă ngăn prăk đru kơ yang ƀuôn leh anăn dŭm anôk bruă djŏ tuôm ksiêm duah, đru kčĕ kluôm hlăm hdră êlan kơrŭ wĭt leh anăn mđĭ kyar bruă duh mkra - ala ƀuôn. Hưn mdah hŏng dŭm gưl bruă mâo klei dưi ksiêm dlăng, bi klă.

Pô mblang: Y-Ƀel Êban