VOV4.Êđê - Tlam hruê 19/9 tui hluê mmông Việt Nam, ti anôk bruă Krŭ Kdơ̆ng ƀuôn prŏng phŭn La Habana, khua lăn čar Cuba Miguel Díaz-Canel gĭt gai leh knăm tŭ drông khua lăn čar Nguyễn Xuân Phúc. Leh klei tŭ drông anăn khua lăn čar Cuba Miguel Díaz-Canel ba anăp êpul bi ala gưl dlông 2 ala čar ngă klei blŭ hrăm. Hlăm klei blŭ hrăm anăn, 2 čô khua gĭt gai bi tŭ ư hruê mmông kơ anăp 2 nah srăng mđĭ klei mjĕ giăm bruă kđi čar hlăm klei bi trông êpul bi ala gưl dlông, rơ̆ng ngă nanao, mâo boh tŭ dưn dŭm klei bi mguôp, mâo wăt klei bi trông đru kčĕ 2 Đảng, dhar bruă lu knŭk kna, ksiêm duah bruă kđi čar pla wah 2 phŭn bruă hŏng tač êngao, klei blŭ hrăm 2 phŭn bruă lĭng kahan.

Khua lăn čar mâo klei lač jăk kơ khua gĭt gai gưl dlông, phŭn bruă mdrao mgŭn lehanăn knơ̆ng bruă mkra mjing êa drao gŭn Cuba, khă ka bi leh ôh bruă tlŏ mgang hlăm ala čar ƀiădah mâo leh klei kah mbha, mkăp brei, ba jao kdrăp mkra mjing vaccine kơ Việt Nam. Anei jing sa klei bi klă kơ klei sa ai mơ̆ng Cuba hŏng Việt Nam. Msĕ si klei blŭ mơ̆ng khua gĭt gai Fidel Castro “kyua Việt Nam, Cuba mprăp đru hŏng jih klei hdĭp pô”.

Y Bel pô mblang