VOV4.Êđê - Khădah mrâo kčưm ngă bruă, ƀiădah klei bi hmô anôk bruă hiu mdrao ti čar Dak Lak phŭn kčưm ƀuh mâo boh tŭ dưn hlăm bruă kriê dlăng klei suaih pral kơ mnuih ƀuôn sang hlăm wưng klei ruă tưp Covid-19 dôk dleh dưi ksiêm dlăng, boh nik jing dŭm anôk dôk ngă klei bi kbưi yang ƀuôn čiăng gang mkhư̆ klei ruă tưp.

Ƀuh mmăt ală mta, êmăn êmiêk, Y Dhôk Êban, ti alŭ 7, ƀuôn Dhă Prŏng, xă Čư̆ Êbur, ƀuôn prŏng Ƀuôn Ama Thuôt pral brei anak êkei nao ti sang kƀĭn ƀuôn mơ̆ng ƀuôn - anôk bruă mdrao mgŭn êrô hiu mơ̆ng să dôk ngă bruă ksiêm mkă. Tinei, leh ksiêm mkă, aê mdrao ƀuh đĭ hnơ̆ng êrah (170/90) anăn hmao mkăp êa drao leh anăn ktrâo lač kơ ñu ktuê dlăng klei suaih pral ti sang. Y-Dhôk Êban brei thâo, mơ̆ng dŭm hruê êlâo, ñu ƀuh hlăm asei mlei êmăn êmiêk, ƀiădah kyua jih ƀuôn hlăk kwang dar, bi ktlah hjăn čiăng gang mkhư̆ klei ruă Covid-19 anăn ñu ka mâo klei găl nao ksiêm mkă. Hmư̆ anak êkei lač să mkŏ mjing anôk mdrao mgŭn êrô hiu jưh ti ƀuôn anăn ñu duah leh anăn nao ksiêm mkă klei suaih pral. “Kâo ƀuh găl ênưih anăn kâo hriê tinei ksiêm mkă, Anôk mdrao mgŭn să Čư̆ Êbur hriê ti ƀuôn đru kơ mnuih ƀuôn sang djuê ƀiă tinei čiăng hgao klei dleh dlan hruê anei anăn kâo ăt bi mni lač jăk kơ ayŏng adei anôk phŭn ngă bruă kơ mnuih djuê ƀiă tinei jăk snăk”.

Anôk mdrao mgŭn êrô hiu să Čư̆ Êbur dưi mkŏ mjing mơ̆ng hruê 15-9 hŏng 6 čô knuă druh, mdrao mgŭn. Anôk mdrao ti sang kƀĭn ƀuôn mơ̆ng alŭ 7 (jing ƀuôn Dhă Prŏng) leh anăn ngă bruă jih hruê mlam, hŏng dŭm bruă ngă gang mkhư̆ klei ruă Covid-19 hlăm êpul êya; kriê dlăng, ktuê dlăng klei suaih pral phung ruă Covid-19 ti sang, ksiêm mkă kman Sars- Cov2, tlŏ mgang vaccin Cpvid-19 leh anăn mkăp hdră kriê dlăng klei suiah pral tal êlâo, ksiêm mkă mdrao mgŭn, ba ti anôk mdrao kơ dlông hĭn kơ mnuih ƀuôn sang. Khă gơ̆ mrâo ngă bruă, ƀiădah anôk bruă hmao ngă djŏ klei čiăng ksiêm mkă klei ruă mnuih ƀuôn sang ti alŭ wăl, anôk dôk hlăm wưng kwang dar kyua mâo phung ruă Covid-19. Aê Mdrao Y Suôm Êñuôl, Khua anôk mdrao mgŭn êrô hiu să Čư̆ Êbur brei thâo: “Pô ngă bruă kơ mnuih ƀuôn sang ksiêm mkă klei ruă aguah tlam, tơdah kjham anei snăn pô nao ba mdrao kơ anôk kơ dlông hĭn. Dưm tinei snăn găl eneuiwh hlăm wưng mâo klei ruă Covid-19 anei snăn mnuih ƀuôn sang mơak leh anăn sang kƀĭn ƀuôn alŭ 7 anei jing anôk phŭn ti ƀuôn anăn mnuih ƀuôn sang mơak snăk. Mnuih ƀuôn sang nao ksiêm mkă tinei snăn pô mkăp êa drao kơ digơ̆, pô nao ti sang ksiêm mkă, test pral grăp gưl kơ mnuih ƀuôn sang wĭt.”

Wăl krah Ƀuôn Hô, jing anôk mâo lu mnuih ruă Covid-19 ti Dak Lak, Anôk bruă mdrao mgŭn dôk mguôp ai tiê hlăm hdră gang mkhư̆ klei ruă tưp leh anăn kriê dlăng klei suaih pral mnuih ƀuôn sang. Anôk bruă mdrao mgŭn wăl krah leh anăn 12 anôk mdrao mgŭn să ƀuôn hgŭm ti alŭ wăl mkŏ mjing leh 15 êpul mdrao mgŭn êrô hiu khăng nao ti dŭm alŭ wăl mnuih ƀuôn sang dôk ktuê dlăng klei suaih pral mnuih ƀuôn sang dôk bi ktlah hjăn ti sang leh anăn mă mta test pral hŏng phung mâo klei bi knăl mơ̆ng klei ruă Covid-19.

Hluê si Nguyễn Mạnh Hùng, Khua dlăng bruă Đảng, Khua Knơ̆ng bruă sang čư̆ êa ƀuôn hgŭm Đoàn Kết - anôk čih yap lu mnuih ruă Covid-19 ti wăl krah Ƀuôn Hồ mkŏ mjing Anôk mdrao mgŭn êrô hiu srăng bi hrŏ lu klei kpĭ kơ anôk mdrao gưl dlông hlăm bruă mdrao kriê dlăng, đru mnuih mâo klei ruă amâo thâo hlao ti alŭ wăl, kyua anăn mjing leh klei găl kơ mnuih ƀuôn sang mơ̆ng nah gŭ. “Anôk bruă mdrao mgŭn êrô hiu lu jing phung aê mdrao jih thŭn mă bruă, phung aê mdrao ngă bruă mnia blei êa drao ti alŭ wăl, mnuih ƀuôn sang hmeu ƀiă anăn hmei bi mklă 1 anôk bruă ƀiădah boh klei rŭng răng đei, ba yua Asăp mtrŭn 16 sui, tơdah amâo ngă djŏ klei čiăng snăn tĭng yap hdră tal 2 jing lŏ dơ̆ng mkŏ mjing sa Anôk mdrao mgŭn dơ̆ng.”

Amâo djŏ knŏng hjăn ƀuôn prŏng Ƀuôn Ama Thuôt leh anăn Wăl krah Ƀuôn Hô ôh, leh mâo klei gĭt gai mơ̆ng Khua knŭk kna, Phŭn bruă mdrao mgŭn, Knơ̆ng bruă mdrao mgŭn Dak Lak gĭt gai dŭm kdriêk, wăl krah, ƀuôn prŏng hlăm čar mjêč mkŏ mjing dŭm anôk bruă hiu mdrao mgŭn ti dŭm să, ƀuôn hgŭm, wăl krah mâo klei huĭ tưp klei ruă lu čiăng ngă bruă kriê dlăng klei suaih pral mnuih ƀuôn sang, amâo brei mâo klei gun kpăk hlăm hdră mdrao mgŭn.

Aê mdrao Trần Thuận, Khua Anôk bruă mdrao mgŭn kdroêk Krông Ƀuk, sa kdriêk krĭng mâo huĭ hyưt kyua klei ruă tưp ti čar, brei thâo: Čiăng mkŏ mjing dŭm anôk mdrao mgŭn êrô hiu, Anôk bruă mđĭ lar mnuih mă bruă hlăm anôk bruă, ti dŭm anôk mdrao mgŭn, êpul ngă bruă mdrao mgŭn hlăm sang hră leh anăn phung knuă druh mdrao mgŭn jih thŭn mă bruă. Êngao kơ kdrăp mnơ̆ng čiăng êdi, êa drao ênua mdrao mgŭn mâo leh, Anôk bruă lŏ mprăp kơ dŭm anôk mdrao mgŭn êrô hiu dŭm giêt ôxy êrô hiu pioh mdrao kơ mnuih ruă Covid-19 ti anôk mdrao mtam tơdah ênoh F0 đĭ lu. “Ară anei mâo êdeh mơ̆ng pô mprăp nanao mdiăng êpul, năng ai mgĭ pô mprăp kơ ƀuôn anei snăn pô mbĕ đuê̆ Êpul mdrao mgŭn êrô hiu leh anăn kdrăp mdrao mgŭn ti năn mtan, năng ai mgi nao ti ƀuôn mkăn tơdah mâo klei čiăng, mbĕ đuê hluê si klei mâo mơ̆ng Lăn Dap Kngư snăn ba nao wăt êpul mă bruă čiăng ktuê dlăng klei suaih pral mnuih ƀuôn sang grăp ƀuôn êlan. Klei yuôm bhăn hĭn ară anei jing pô ktuê dlăng snăn hâo hưn kơ mnuih ƀuôn sang mđĭ klei thâo dăng leh anăn pô thâo bruă mnuih ƀuôn sang ngă”.

 Khă gơ̆ mrâo ngă bruă ti dŭm alŭ wăl hlăk jing anôk mâo lu mnuih ruă Covid-19 ti Dak Lak, ƀiădah dŭm anôk bruă mdrao mgŭn êrô hiu leh anăn anôk mdrao mgŭn sa anôk dôk mđĭ lar leh anăn bi đru, kñăm ngă djŏ klei čiăng ksiêm dlăng, mdrao klei ruă kơ mnuih ƀuôn sang hlăm wưng bi ktlah hjăn.