VOV4.Êđê - Mlan pŭr yan hla luh thŭn anei jing wưng yuôm bhăn hŏng lu phung hđeh êlăk hlăm dŭm anôk mdrao mgŭn lehanăn anôk bi ktlah, kwang dar čiăng gang mkhư̆ klei ruă tưp Covid-19 ti čar Dak Lak. Amâo mâo ênai hgơr, kdŏ anak rai amâodah klei mdah hlăp Aduôn Sun, Y-Rĭt. Phung adei ăt mâo klei mơak kyua mâo dŭm hnư mnơ̆ng wưng Mlan yan hla luh lehanăn klei uêñ mĭn mơ̆ng dŭm êpul êya, phung mă bruă mdrao mgŭn ti nei.

Mă kdô hnư mnơ̆ng mlam mlan pur mơ̆ng dŭm anôk bruă nao mđup brei, adei H Samuel Adrơ̆ng, ti ƀuôn Pưk Prŏng, să Ea Ning, kdriêk Čư̆ Kuin brei thâo, anei jing mlam mlan pur mdê êdi hŏng phung hđeh mơ̆ng êlâo truh ară anei. Hlăm wưng anei dŭm thŭn êlâo, ñu hŏng adei mniê mơak čang guôn djă pui hruh nao ti sang kƀĭn ƀuôn leh anăn phung êdam êra mkŏ mjing kdŏ mmuiñ, dlăng Êrit, aduôn Sun. Thŭn anei kyua klei ruă Covid-19 dleh ktuê dlăng, ƀuôn Pưk Prŏng kwang dar čiăng gang mkhư̆ klei ruă Covid-19 anăn ai êwa hlăm ƀuôn sang kriêp êyăng. Khădah, ñu ăt mơak kyua mâo mnơ̆ng mlam mlan pur hlăm wưng 2 amai adei čŏng mkra mjing klei hlăp ti sang. Kâo mơak snăk dưi mâo mnơ̆ng mơ̆ng phung ayŏng amai adei, kâo srăng mkŏ mjing kơ phung hđeh sa yan mlam mlan pur hơ̆k mơak. Kâo bi mni lač jăk kơ Êpul hgŭm kriê dlăng phung hđeh čar leh anăn Sang dhar kreh phung êdam êra Dak Lak brei leh mnơ̆ng kơ kâo.

Ti wăl mdrao mnuih ruă ti sang êa drao jing jai mrô 1 čar Dak Lak, dŭm hruê anei ai êwa mơak hĭn. Mbĭt hŏng bruă kriê dlăng leh anăn mdrao kơ mnuih ruă, phung knuă druh, mnuih mă bruă tinei lŏ bi ala kơ phung kăp đru nao ti grăp boh adŭ čiăng mđup brei mnơ̆ng kơ phung hđeh dôk mdrao mgŭn klei ruă Covid-19. Aê mdrao chuyên khoa 2 Phạm Thị Tuyết Nhung, K’iăng Khua Sang êa drao jing jai mrô 1 brei thâo, tinei ară anei dôk tŭ jum leh anăn mdrao mgŭn kơ giăm 500 čô mnuih ruă, hlăm anăn mâo 117 čô hđeh, hđeh điêt hĭn knŏng mrâo êbeh 1 mlan. Ară anei, klei suaih pral mnuih ruă dưi ƀiă leh, klei dưi lŏ krŭ wĭt klei suaih pral jăk. Dŭm hruê êgao, sang êa drao mâo klei mđing dlăng mơ̆ng êpul bruă, anôk bruă, mơ̆ng phung knuă druh, mnuih mă bruă hlăm sang êa drao čiăng mđup brei mnơ̆ng mlam mlan pur kơ phung hđeh. Aê mdrao Phạm Thị Tuyết Nhung lač, anei jing bruă ngă yuôm bhăn, đru mđĭ ai phung hđeh, kyua anăn đru kơ phung hđeh hơĭt ai tiê mă bruă, mơak hĭn, đru bi hrŏ wưng mdrao mgŭn leh anăn mđĭ klei dưi mdrơ̆ng hŏng klei ruă tưp čiăng hnưm hlao klei ruă. Phung hđeh hriê tinei amâo djŏ knŏng dưi mdrao mgŭn, kriê dlăng đuič ôh, ƀiădah lŏ dưi ktrâo lač si ngă čiăng dưi hŏng asei pô, hgao jih klei ruă hnưm wĭt hŏng gŏ sang. Mlam mlan pur thŭn anei sang êa drao ăt mâo phung mâo ai tiê kmah hriê mđup brei mnơ̆ng snăn ăt mơak snăk leh anăn đru mguôp hlăm bruă hnưm msir mgaih klei dleh dlan, hgao jih klei ruă tưp čiăng wĭt hŏng gŏ sang, êpul êya.

 Ti anăp klei ruă Covid-19 dleh ktuê dlăng, lu alŭ wăl ti Dak Lak dôk bi ktlah hjăn, kwang dar čiăng gang mkhư̆ klei ruă tưp. Hŏng klei čang hmăng ba kơ phung hđeh điêt sa mlam mlan pur krah yan hla luh jăk mơak leh anăn yuôm bhăn, dŭm gưl bruă êdam êra, hđeh điêt hlăm čar bi hgŭm hŏng dŭm anôk bruă leh anăn phung mâo ai tiê kmah mkŏ mjing hdră mlam mlan pur hŏng akŏ “Puih hruh kuič mngač klei čang hmăng - bi đru phung hđeh, hrăm mbĭt hgao klei ruă tưp”. Ayŏng Trần Doãn Tới, K’iăng Khua bruă êdam êra čar Dak Lak brei thâo, hdră srăng mơĭt kơ phung hđeh dŭm hnư mnơ̆ng, ƀêñ, hnư hriăm hră, puih hruh, êa ksâo leh anăn mnơ̆ng yua hriăm hră. Tui hluê si boh sĭt ti dŭm alŭ wăl, êpul bruă êdam êra srăng mkŏ mjing dŭm bruă ngă djŏ guôp jing bruă yuôm bhăn klă sĭt čiăng hmao đru leh anăn mđĭ ai phung hđeh hlăm mlam mlan pur krah yan hla luh. Hjăn hŏng gưl čar, Êpul hgŭm kriê dlăng phung hđeh čar bi hgŭm hŏng phung kăp đru srăng mđup brei 500 hnư mnơ̆ng kơ phung hđeh mâo klei hdĭp dleh dlan, leh anăn phung hđeh dôk mdrao mgŭn amâodah dôk bi ktlah hjăn, kwang dar čiăng gang mkhư̆ klei ruă Covid-19.Hŏng dŭm anôk bruă, dŭm alŭ wăl ka mâo ôh mnuih ruă, krĭng huĭ mâo mnuih ruă, krĭng mâo lu mnuih ruă snăn ruah hdră mkŏ mjing bi djŏ guôp si bĕ ngă čiăng phung hđeh mâo klei hdĭp dleh dlan, phung hđeh dôk hlăm wăl kwang dar, phung hđeh êrĭt amĭ ama, amâo jăk asei mlei dưi mâo yan mlam mlan pur trei mđao khă gơ̆ hlăm boh klei amâo kƀĭn lu mnuih. Hŏng gưl čar snăn Anôk dlăng bruă êdam êra čar, Êpul hgŭm kriê dlăng phung hđeh čar mkŏ mjing leh ti sang êa drao jing jai leh anăn dŭm sang êa drao krĭng wăl čiăng kriê dlăng leh anăn ba ai êwa mlam mlan pur truh kơ phung hđeh.

 Sa mlam mlan pur krah yan hla luh truh mdê êdi hŏng dŭm thŭn êlâo, kyua hmaĭ mơ̆ng klei ruă tưp Covid-19, lu phung hđeh Dak Lak hŏng kluôm ala amâo mâo ôh klei găl dưi djă pui hruh, hlăp lêñ amâodah dlăng kdŏ anak rai. Khădah hŏng klei mđing dlăng mơ̆ng bruă sang čư̆ êa leh anăn dŭm anôk bruă êpul hgŭm, phung hđeh dưi drông leh sa yan mlam mlan pur jăk mơak leh anăn yuôm bhăn hŏng dŭm hnư mnơ̆ng djŏ mmông leh anăn sĭt êdi./.