VOV4.Êđê- Anôk bruă sang čư̆ êa kdriêk Êa Hleo, čar Dak Lak brei thâo: Hdră bruă pui kmlă êran hŏng ai angĭn Êa Nam ti alŭ wăl kdriêk dưi ngă leh, knŏng mkra mđĭ dŭm kdrăp mrô lehanăn srăng dưi hlai mbĭt hŏng êlan pui kmlă ala čar. Anei amâo djŏ knŏng jing hdră pui kmlă êran hŏng ai angĭn ti lăn hang prŏng êdi kluôm ala ƀiădah lŏ ba wĭt boh tŭ hlăm bruă duh mkra lehanăn ala ƀuôn. Hdră bruă pui kmlă êran hŏng ai angĭn Êa Nam mâo Êpul group Trung Nam ngă pô duh bi liê, mâo 84 gơ̆ng; 1,2 km êlan klei pui 500 kv, hŏng ênoh duh bi liê 16.500 êklai prăk, pŏk ngă ti 3 să Êa Nam, Êa Khal lehanăn Dliê Yang, kdriêk Êa Hleo.

Hdră mâo klei bi mklă duh bi liê hlăm hruê 31/12/2020 lehanăn wưng hluê ngă mâo mkŏ mjing êjai klei ruă Covid 19 dôk bluh mâo dleh ksiêm dlăng, Khă snăn, hŏng klei gĭr mơ̆ng phung duh bi liê, êpul êya ngă mkra, anôk bruă sang čư̆ êa dŭm gưl, êpul bruă kdriêk Êa Hleo lehanăn čar Dak Lak, hdră anei dưi ngă ruê̆ ênŭm, amâo mâo klei gun kpăk. Hluê si klei tĭng mơ̆ng phung duh bi liê, leh mŭt ngă bruă, Hdră bruă pui kmlă êran hŏng ai angĭn Êa Nam srăng mkra mjing êbeh 1,1 êklai kWh/thŭn. Tơdah anôk bruă pui kmlă blei jih pui anei, hnư hrui wĭt 1 thŭn mơ̆ng hdră anei srăng mâo hlăm brô 94 êklăk đolar, đru mguôp hlăm ngăn prăk alŭ wăl hlăm brô 250 êklai prăk./.

                                                    Pô mblang: H’Nêč Êñuôl