VOV4.Êđê - Hŏng klei găl kơ dŭm mnơ̆ng dhơ̆ng boh mnga bruă lŏ hma, mbĭt hŏng dŭm hdră êlan, klei đru mơ̆ng čar, leh 3 thŭn mkŏ mjing, hdră grăp să sa mnơ̆ng dhơ̆ng OCOP ti čar Dak Lak mâo lu boh tŭ dưn jăk, mkŏ mjing klei bi lar, bi klă anăn knăl boh mnga bruă lŏ hma hlăm alŭ wăl.

Mbĭt hŏng kphê, ca cao jing 1 hlăm dŭm mta mnơ̆ng dưi dlăng jing phŭn, jăk găl mơ̆ng čar Dak Lak. Khă snăn, dŭm thŭn êlâo, cacao Dak Lak ƀiă snăn mnuih thâo lehanăn knŏng ba čhĭ snăn. Ênoh yuôm mnơ̆ng dhơ̆ng ba wĭt ƀiă, ka ba yua jih ôh klei jăk găl ti krĭng ƀuôn sang. Ƀuh klă klei êdu kƀah anăn, Trương Ngọc Quang, Khua anôk bruă TNHH Ca cao Nam Trường Sơn ti să Êa Na, kdriêk Krông Ana mđing tui ksiêm leh kơ wăl anôk mnia mblei, duh bi liê kdrăp mnơ̆ng mrâo mrang čiăng mkra mjing dŭm mta mnơ̆ng jăk mơ̆ng cacao, msĕ si: Kpŭng cacao, ƀơr cacao, kĕo cacao... Čiăng bi mklă hnơ̆ng tŭ jăk, anôk bruă nao hgŭm bi mklă leh hdră OCOP gưl čar. Truh kơ ară anei, 3 mta mnơ̆ng mâo: Kpŭng cacao, Kĕo Socola jŭ, Kĕo Socola êa ksâo mơ̆ng Anôk bruă djăp hnơ̆ng čuăn 4 mtŭ hlăm ênoh 8 mta mnơ̆ng êdeh êdi 4 mtŭ gưl čar. Trương Ngọc Quang, Khua anôk bruă brei thâo:“Leh mta mnơ̆ng mơ̆ng anôk bruă djăp hnơ̆ng čuăn OCOP 4 mtŭ gưl čar, anei ăt jing kdrông mkŏ čiăng kơ anôk bruă nao hgŭm hlăm dŭm anôk čhĭ mnơ̆ng OCOP. Hluê hŏng dŭm anôk čhĭ mnơ̆ng OCOP sa kdrêč bi êdah klei thâo ăt msĕ mơh hnơ̆ng tŭ jăk mơ̆ng mnơ̆ng dhơ̆ng, mơ̆ng anăn phung tuê ba yua đăo knang lehanăn bi mni. Hluê hŏng dŭm anôk čhĭ mnơ̆ng OCOP anei, dŭm mta mnơ̆ng dưi truh kiê kngan mnuih blei yua hŏng sa hdră pral lehanăn lar bra hĭn”.

Hluê si Võ Văn Sơn, Khua êpul hgŭm bruă lŏ hma Thăng Bình, să Čư̆ Kty, kdriêk Krông Bông, čar Dak Lak, bi mklă OCOP kơ mnơ̆ng dhơ̆ng ƀrư̆ hruê ƀrư̆ mâo klei mđing dlăng, jing boh kdrŭt klă sĭt kơ anôk bruă mkra mjing, mnia mblei. Dŭm mta mnơ̆ng dưi bi mklă OCOP jing sa knhuang tĭng dlăng yuôm bhăn, đru kơ dŭm mta mnơ̆ng anei dưi rŏng kjăp hnơ̆ng tŭ jăk, hruh đŭng siam, bi mklă phŭn agha anôk mkra mjing lehanăn mđĭ ai bi ktưn hlăm wăl anôk mnia mblei. Klei bi mklă nik hĭn jing mta braih doh HTB mơ̆ng Êpul hgŭm bruă hlăk mâo Anôk bruă sang čư̆ êa čar Dak Lak tŭ yap jing mta mnơ̆ng OCOP 3 mtŭ, ênoh čhĭ đĭ hĭn 2 blư̆ mkă hŏng êlâo, hnơ̆ng blei yua ăt đĭ mơ̆ng 200 – 400 ton/thŭn, ba wĭt boh tŭ hlăm djăp mta bruă kơ êpul hgŭm bruă ăt msĕ mơh kơ mnuih hgŭm hlăm êpul. Võ Văn Sơn chia lač snei: “Êlâo adih mnơ̆ng dhơ̆ng pô amâo mâo mnuih thâo ôh, bruă mnia mblei ăt tuôm hŏng lu klei dleh dlan mơh, ƀiădah leh mnơ̆ng dhơ̆ng mâo bi mklă djăp hnơ̆ng čuăn OCOP mđĭ truh ti 1 hnơ̆ng mrâo kơ hnơ̆ng tŭ jăk, hdră mkra mnơ̆ng dhơ̆ng mmông anăn mnuih blei yua ênưih tĭng dlăng, thâo, duah ksiêm lehanăn blei yua mnơ̆ng pô. Anei ăt jing sa klei bi mlih mơ̆ng mnơ̆ng dhơ̆ng pô mkra mjing jing mnơ̆ng dhơ̆ng mâo bi mklă djăp hnơ̆ng čuăn OCOP dŭm mtŭ lehanăn ăt jing klei găl čiăng ba mnơ̆ng dhơ̆ng mơ̆ng ƀĭng ngă lŏ hma arăng knŏng thâo “hlăm krĭng ƀuôn sang” truh kơ wăl anôk mnia mblei prŏng.

Nguyễn Hoài Dương, Khua knơ̆ng bruă lŏ hma mđĭ kyar krĭng ƀuôn sang čar Dak Lak brei thâo: Dak Lak ară anei mâo 46 mta mnơ̆ng OCOP, hlăm anăn, mâo 8 mta mnơ̆ng djăp hnơ̆ng čuăn 4 mtŭ, 38 mta mnơ̆ng djăp hnơ̆ng čuăn 3 mtŭ. Bruă kah mbha, dăp dưm, bi mklă mtŭ hŏng mta mnơ̆ng OCOP jing sa klei bi mklă kơ hnơ̆ng tŭ jăk, hruh đŭng, bi msiam mnơ̆ng dhơ̆ng. Klei anei đru mguôp mđĭ klei thâo săng, klei đua klam mơ̆ng mnuih ƀuôn sang, mơ̆ng anôk bruă duh mkra hlăm bruă mkra mjing, rơ̆ng kjăp anăn knăl mơ̆ng mta mnơ̆ng OCOP ăt msĕ mơh klei tŭ dưi mơ̆ng mnuih blei yua. Hlăm wưng ti anăp, anôk bruă lŏ hma srăng bi hgŭm hŏng anôk bruă tuh tia mnia mblei lŏ dơ̆ng hưn mthâo dŭm mta mnơ̆ng OCOP mâo ti alŭ wăl truh kơ mnuih blei yua hlăm lehanăn êngao ala čar. “Hdră bi hgŭm blei yua mnơ̆ng dhơ̆ng jing hdră yuôm bhăn êdi hlăm bruă bi mklă boh tŭ yuôm mnơ̆ng dhơ̆ng OCOP. Dưi bi mklă bruă anei Knơ̆ng bruă Tuh tia mnia mblei dôk akâo kơ Anôk bruă sang čư̆ êa čar bi mklă hdră đru blei yua mnơ̆ng dhơ̆ng OCOP. Hdră anei dưi bi mklă srăng đru mkŏ mjing lu anôk čhĭ mnơ̆ng dhơ̆ng OCOP hĭn. Mơ̆ng anăn, bi hgŭm hŏng dŭm alŭ wăl, dŭm krĭng kwar hlăm kluôm ala čiăng blei yua mnơ̆ng dhơ̆ng, mtrŭt mđĭ mta mnơ̆ng OCOP đĭ kyar pral hĭn hlăm wưng ti anăp.

Gĭr ba mnơ̆ng dhơ̆ng alŭ wăl dưi bi mklă jing mta mnơ̆ng OCOP jing leh boh kdrŭt kñăm mtrŭ mđĭ kyar bruă duh mkra krĭng ƀuôn sang ti Dak Lak. Klei anei dôk mjing boh kdrŭt prŏng kơ hdră mkŏ mkra krĭng ƀuôn sang mrâo hluê hdră h’ĭt kjăp mơ̆ng bruă bi mklă khưm kơ mnơ̆ng dhơ̆ng bruă lŏ hma ti alŭ wăl./.