VOV4.Êđê -  Hlăm wưng êgao, čar Dak Lak mâo êbeh 17 êbâo čô mnuih mơ̆ng dŭm čar kwar Dhŭng wĭt kơ ƀuôn sang, dưi ba bi ktlah djŏ si klei kčah mtrŭn hlăm hdră gang mkhư̆ klei ruă Covid 19. Mbĭt hŏng anăn mâo dŭm pluh êbâo čô wĭt kơ kwar Krah, truh kơ kwar Dưr ăt găn alŭ wăl čar Dak Lak. Dŭm knơ̆ng, dhar bruă, êpul êya mbĭt hŏng mnuih ƀuôn sang alŭ wăl đru mguôp leh mnơ̆ng dhơ̆ng, mkăp êsei huă djam ƀơ̆ng amâo mă prăk kơ mnuih ƀuôn sang ti ktuê êlan wĭt lehanăn mkăp mnơ̆ng ƀơ̆ng huă kơ mnuih dôk bi ktlah h’ĭt ai tiê gang mkhư̆ klei ruă tưp. Hdră anei đru “Mđĭ ai” leh ktuê êlan wĭt kơ ƀuôn sang adôk lu klei dleh dlan, suaĭ êmăn mơ̆ng mnuih ƀuôn sang.

Hlăm ktuê êlan mơ̆ng ƀuôn prŏng Hồ Chí Minh wĭt čar Quảng Nam, amai Đỗ Thị Thanh Châu dưi đru kơ mnơ̆ng dhơ̆ng leh anăn ai tiê. Leh dôk mdei ti anôk đru êsei leh anăn êa mnăn ti anăp sang hră gưl 2 Trần Phú, să Hòa Phú, ƀuôn prŏng Ƀuôn Ama Thuôt, čar Dak Lak, ñu mgei ai tiê: “Mâo êsei, êa mnăm, êa ksâo djăp ênŭm. Aguah ăt mâo phung brei prăk kơ hđeh. Kâo ƀuh bŏ hŏng klei khăp. Tal êlâo snăn ênguôt snăk ƀiădah kbiă ti êngao snăn ƀuh lu snăk klei khăp snăn mđĭ ai pô bŏ hŏng hơ̆k mơak leh anăn hdơr nanao klei khăp mơ̆ng jih jang phung ayŏng amai adei đru.”

Hlăm wưng êgao, Êpul hgŭm gru bi kal hrah čar Dak lak bi hgŭm hŏng dŭm êpul đru kơ mnuih knap mñai tŭk knă dŭm êbâo hnư êsei huă grăp hruê đru kơ phung wĭt mơ̆ng dŭm čar Nah Dhŭng, Dŭm hnư êsei, bur amâodah ƀêñ mì đru bi mdul klei êmăn suăi mơ̆ng phung wĭt kơ ƀuôn sang. Trần Thị Phương Thu, K’iăng khua êpul hgŭm gru bi kal hrah čar Dak lak brei thâo: Grăp hruê mâo mơ̆ng 5000-6000 hnư êsei mâo dŭm êpul đru kơ mnuih knap mñai, anôk tŭk knă đru kơ mnuih knap mñai ti dŭm anôk đru ti êlan dơ̆ng prŏng mtô 14 (ti să Hoà Phú, ƀuôn prŏng Ƀuôn Ama Thuôt). Êpul hgŭm mkŏ mjing leh klei gĭt gai, mbha mmông leh anăn anôk tŭ jum čiăng mkhư̆ klei mnuih ƀuôn sang dôk bi ngi ti sa anôk. “Ară anei, ti dŭm anôk ktuê dlăng klei ruă tưp ti ƀuôn prŏng Ƀuôn Ama Thuôt, čar gĭt gai hưn klei suaih pral leh anăn mbha êlan kơ dŭm kdriêk drông mnuih ƀuôn sang wĭt kơ dŭm kdriêk, test pral leh anăn bi ktlah hjăn. Ti anăp boh klei anăn, Êpul hgŭm gru bi klah hrah čar gĭt gai dŭm kdriêk, wăl krah, ƀuôn prŏng lŏ dơ̆ng đru kơ mnuih ƀuôn sang kơ mnơ̆ng ƀơ̆ng huă leh anăn êa mnăm. Mbĭt anăn čih mkra hdră đru, pŏk ngă anôk tŭk knă đru kơ hdră gang mkhư̆ klei tưp ti alŭ wăl.”

Amâo djŏ knŏng ti ƀuôn prŏng Ƀuôn Ama Thuôt ôh, dŭm hruê êgao ti alŭ wăl dŭm kdriêk ti čar Dak Lak ktuê êlan dơ̆ng prŏng mrô 14, lu anôk bruă đru kơ mnuih knap mñai, phung čŏng ngă bruă leh anăn dŭm êpul hgŭm alŭ wăl ăt mkŏ mjing lu anôk kăp đru kơ phung wĭt kơ ƀuôn sang găn tinăn.

Mbĭt hŏng bruă đru kơ phung găn ti êlan, hlăm wưng êgao, dŭm êpul hgŭm leh anăn mnuih ƀuôn sang ti Dak lak ăt mkŏ mjing dŭm anôk tŭk knă amâo mă prăk čiăng đru kơ phung bi ktlah hjăn sa anôk. Hoàng Thị Thu Hương, Khua Êpul hgŭm phung mniê să Xuân Phú, kdriêk Ea Kar kriê dlăng” anôk tŭk knă amâo mă prăk” tinei, brei thâo, ară anei anôk tŭk knă mâo 100 čô hgŭm, grăp hruê mâo mơ̆ng 5 truh 10 čô bi mlih tŭk Klei tŭk knă. Truh ară anei tŭk knă leh êbeh 10 êbâo hnư êsei amâo mă prăk kơ mnuih ƀuôn sang wĭt bi ktlah hjăn. “Mơ̆ng boh sĭt mnuih ƀuôn sang lu nao mă bruă kbưi wĭt kơ alŭ wăl mâo klei hdĭp dleh dlan leh anăn gŏ sang ti anôk kbưi amâo dưi hriê ba êsei djam ôh. Snăn hmei ngă anôk tŭk knă amâo mă prăk leh anăn dŭm êpul hiu iêo jăk mnuih ƀuôn sang mđĭ lar mơ̆ng hlăk mphŭn mâo klei ruă tưp truh ară anei. Ai tiê phung amai adei hur har, boh nik đa đa amâo guôn iêo jak ôh, sĭt wăn snăn ăt hriê đru msĕ si bruă hlăm gŏ sang pô. Tal êlâo hmei iêo jak dŭm gŏ sang mâo anak čô dôk bi ktlah ti alŭ wăl đru tŭk knă, čiăng thâo hmei tŭk jăk, doh amâodah hơaĭ”

Hluê si Đào Đức Hoàn, Khua Knơ̆ng bruă sang čư̆ êa să Xuân Phú, hlăm wưng êgao mâo êbeh 100 čô wĭt mơ̆ng dŭm čar nah Dhŭng, dôk bi ktlah hjăn sa anôk ti dŭm sang kƀĭn alŭ, ƀuôn, Čiăng kơ mnuih ƀuôn sang hơĭt ai tiê, bruă sang čư̆ êa alŭ wăl leh anăn dŭm êpul hgŭm iêu jak anôk bruă duh mkra, phung mâo ai tiê kmah đru kơ “anôk tŭk knă amâo mă prăk”, đru kơ dŭm wăl bi ktlah hjăn sa anôk. “Mnuih ƀuôn sang leh wĭt tal êlâo tuôm hŏng lu klei dleh dlan. Ƀiădah knŏng leh sa, dua hruê diñu ƀuh klei ngă bruă mơ̆ng anôk tŭk knă êpul lu leh anăn ai tiê mơ̆ng alŭ wăl kơ hdră gang mkhư̆ klei ruă tưp snăn hơĭt ai tiê, hluê ngă jăk dŭm klei kčah mtrŭn gang mkhư̆ klei ruă Covid-19. Truh wưng anei să Xuân phú drông leh êbeh 1000 čô mnuih hlăm dŭm gưl wĭt bi ktlah hjăn ti alŭ wăl. Jih jang amâo đru mguôp ya mta mnơ̆ng ôh hlăm klei huă ƀơ̆ng ti wăl bi ktlah hjăn. Ară anei bruă gang mkhư̆ klei ruă tưp mơ̆ng alŭ wăl hmei găl ênưih kyua mnuih ƀuôn sang hrăm mbĭt čiăng đru kơ phung mă bruă wĭt kơ ƀuôn sang.”

Dŭm hnư êsei, mngan bur amâodah ƀêñ mi, giêt êa dưi mđup brei ti kngan phung găn ti êlan leh anăn phung bi ktlah hjăn bi êdah klei khăp sĭt suôr mơ̆ng mnuih ƀuôn sang Dak lak hŏng phung mâo klei hdĭp dleh dlan. Bruă ngă yuôm bhăn anei mơ̆ng mnuih ƀuôn sang Dak Lak đru kơ hdră wĭt ti ƀuôn sang adôk mâo lu klei dleh dlan.