VOV4.Êđê - Tlam hruê 9-9, Khua Knơ̆ng bruă sang čư̆ êa kdriêk Ea Hleo, čar Dak Lak brei thâo dôk bi hgŭm hŏng bruă mdrao mgŭn čar čiăng ngă dŭm klei kčah mtrŭn mdrao mgŭn leh ƀuh 2 čô thơ̆ng kơ bruă ala tač êngao hriê ti kdriêk čiăng rŭ mdơ̆ng hdră bruă pui kmlă êran hŏng angĭn djŏ kman SARS-CoV-2. Hluê si Nguyễn Văn Hà, Khua Knơ̆ng bruă sang čư̆ êa kdriêk Ea Hleo, hruê 6-9, êpul thơ̆ng kơ bruă ala tač êngao mâo 6 čô hriê mơ̆ng ƀuôn prŏng Hồ Chí Minh truh ti kdriêk čiăng rŭ mdơ̆ng hdră bruă pui kmlă êran hŏng angĭn. Truh ti kdriêk, jih 6 čô anei dưi bi ktlah hjăn ti sang jưh, grăp čô sa boh adŭ. Hruê 8-9, Anôk bruă mdrao mgŭn kdriêk Ea H’leo mă mta ksiêm mkă pral snăn 2 čô hlăm 6 čô anei djŏ kman SARS-CoV-2. Phung anei dưi tlŏ leh 2 aruăt vaccin Covid-19 leh anăn dưi bi ktlah hjăn 14 hruê hluê si klei kčah mtrŭn ti ƀuôn prŏng Hồ Chí Minh. CDC Dak Lak bi mklă bruă 2 čô anei mtưp klei ruă kơ pô mkăn jing ƀiă. Ară anei, dŭm anôk bruă djŏ tuôm čar Dak Lak leh anăn kdriêk Ea H’leo dôk ngă hră mơar ba 2 čô anei nao mdrao mgŭn, mbĭt anăn bi ktlah hjăn kơ phung thơ̆ng kơ bruă mkăn hluê si klei kčah mtrŭn.

H Zawut pô mblang