VOV4.Êđê - Klei hưn mơ̆ng anôk bruă mdrao mgŭn čar Dak Lak, hlăm 24h êgao, tĭng mơ̆ng 4h tlam hruê 21/10 truh kơ 4h tlam hruê 22/10, čar mâo 174 čô djŏ kman Sar CoV2. Klă klơ̆ng, ti wăl krah Ƀuôn Hô mâo 64 čô djŏ kman Sar CoV2, kdriêk Čư̆ Kuiñ 29 čô, kdriêk Krông Ƀŭk 25 čô, kdriêk Krông Ana 13 čô, kdriêk Čư̆ Mgar 12 čô, ƀuôn prŏng Ƀuôn Ama Thuôt  11 čô. Klei năng mđing, hlăm 174 čô ruă mrâo, mâo 82 čô ruă ƀuh hlăm êpul êya. Dŭm alŭ wăl msĕ si: Wăl krah Ƀuôn Hô, kdriêk Krông Ƀŭk, Čư̆ Kuiñ, ƀuôn prŏng Ƀuôn Ama Thuôt... mâo nanao mnuih ruă hlăm krĭng mnuih ƀuôn sang dôk. Ti anăp klei hmao ƀuh lu mnuih ruă hlăm êpul êya, anôk bruă mdrao mgŭn Dak Lak dôk bi hgŭm kjăp hŏng anôk bruă sang čư̆ êa dŭm alŭ wăl tui duah, mă mta ksieme dlăng dŭm êbâo čô djŏ tuôm hŏng mnuih ruă kñăm pral hmao ƀuh F0, gang mkhư̆ klei tưp lar. Mbĭt anăn pŏk dŭm hdră đru kñăm rơ̆ng kjăp klei hdĭp mda mnuih ƀuôn sang ti dŭm anôk bi ktlah, krĭng kwang dar./.

H Nêč pô mblang