VOV4.Êđê - Mơ̆ng mlan 10 truh ară anei, čar Dak Lak čih yap ênoh mnuih ruă Covid-19 đĭ lu ka yuôm mâo leh anăn hlăk jing anôk mâo lu hĭn mnuih ruă Covid-19 hlăm kluôm ala. Ti anăp klei kpĭ mơ̆ng klei ruă tưp, bruă gang mkhư̆ klei ruă tưp ti čar Dak Lak bi êdah klei êdu kƀah, boh nik kơ mnuih mă bruă, klei dưi ksiêm mkă leh anăn hnơ̆ng tlŏ vaccin. Čar dôk gĭr msir mgaih klei êdu kƀah leh anăn mkhư̆ ênoh mnuih tưp djŏ.

Čar Dak Lak hlăm gưl klei ruă tưp Covid-19 bluh đĭ tal 4 anei mâo ênoh mnuih ruă kdlưn hĭn hŏng ênoh giăm 5 êbâo čô mâo klei ruă tưp Covid-19 hlăm dŭm hruê êgao. Hlăm anăn ƀuôn prŏng Ƀuôn Ama Thuôt êgao leh hnơ̆ng 1000 čô mnuih ruă. Hlăm êbeh 600 čô mâo mnuih ruă hlăm wang 2 hruê kăm êgao, mâo truh kơ 90% jing mnuih ruă hlăm êpul êya yang ƀuôn, mđĭ gưl klei ruă tưp ti ƀuôn prŏng jing gưl tal 4. Vũ Văn Hưng, khua bruă sang čư êa ƀuôn prŏng Ƀuôn Ama Thuôt brei thâo, klei ruă tưp Covid-19 ti ƀuôn prŏng ară anei dleh êdi tui duah mâo boh tŭ dưn. “Ară anei mâo lu mnuih ruă hlăm êpul êya yang ƀuôn amâo thâo bĭt phŭn mtưp, boh nik klei anei jing kyua phung mrâo wĭt mơ̆ng anôk mâo klei ruă amâo hưn mdah klei suaih pral leh anăn amâo mâo ngă klei bi ktlah ti sang. Ară anei tui duah phung F1 dleh êdi kyua ênoh lu lĭn. Ƀiădah ƀuôn prŏng leh anăn 21 să, ƀuôn hgŭm mkŏ mjing êpul tui duah, leh anăn mâo wăt êpul tui duah mơ̆ng ƀuôn prŏng.  Anôk bruă ksiêm dlăng kman krĭng Lăn Dăp Kngư ăt đru sa êpul tui duah, ksiêm mkă kman pral kluôm ƀuôn prŏng.”

Ênoh mnuih ruă đĭ hmar êjai hnơ̆ng tlŏ mgang vaccine kluôm čar Dak Lak dôk hlăm hnơ̆ng ƀiă hĭn hlăm kluôm ala. Yap truh kơ akŏ mlan 11, ênoh mnuih dưi tlŏ mgang aruăt tal 1 mâo 58,6% leh anăn ênŭm 2 aruăt jing 9,11%. Hnơ̆ng tlŏ mgang ƀiă anăn mđĭ klei tưp lar klei ruă hlăm yang ƀuôn ăt msĕ hŏng mđĭ klei kpĭ kơ bruă mdrao mgŭn mnuih ruă.

Trịnh Quang Trí, khua kiă kriê anôk bruă ksiêm dlăng klei ruă tưp čar Dak Lak brei thâo, truh kơ hruê 30/10, čar Dak Lak tŭ mă leh hlăm brô 1 êklăk hnơ̆ng vaccine gang mkhư̆ klei ruă tưp Covid-19 mơ̆ng gưl dlông. Tơdah tlŏ jih hnơ̆ng vaccine anei srăng mâo 72% ênoh mnuih mâo tlŏ aruăt tal 1 leh anăn dưi bi hmar bruă tlŏ mgang. Dŭm anôk bruă mdrao mgŭn hlăm să, ƀuôn hgŭm ară anei dưi tlŏ hlăm brô 200-300 aruăt hlăm sa hruê. Kyuanăn kah knar sa hruê čar Dak Lak dưi tlŏ mgang hlăm brô 40.000 aruăt. Jing jang vaccine srăng tlŏ bi leh êlâo kơ hruê 5/11. Nao mbĭt hŏng bruă anăn, mĭn tĭng hlăm mlan 11-2021 srăng lŏ tŭ mă dŭm gưl vaccine mkăn. Bi kơ ƀuôn prŏng Ƀuôn Ama Thuôt ƀuăn rơ̆ng srăng tlŏ mgang aruăt tal 1 truh 100% kơ mnuih ƀuôn sang mơ̆ng 18 thŭn kơ dlông êlâo kơ hruê 15/11/2021.”

Čar Dak Lak čih yap mâo leh giăm 5000 čô mâo klei ruă tưp Covid-19, hlăm anăn mâo 50% dôk mdrao mgŭn. Năng mđĭng hĭn, hlăm 10 hruê giăm anei, ênoh mnuih mâo klei ruă tưp ti čar Dak Lak dôk nanao hlăm hnơ̆ng 3 mrô, ênoh mnuih mâo klei ruă tưp hlăm êpul êya yang ƀuôn lu hŏng lu êpul êya mâo klei ruă tưp dleh ksiêm dlăng. Tui si Nay Phi La, khua kiă kriê knơ̆ng bruă mdrao mgŭn čar Dak Lak, tơdah klei ruă tưp amâo hrŏ ôh hlăm dŭm hruê kơ anăp, alŭ wăl srăng kñăm jih ai mdrao kơ phung F0 leh anăn năng ai srăng čiăng êdi klei đru. Srăng gang mkhư̆ mơ̆ng gưl 1 leh anăn gưl 2, ti nei srăng mâo klei dleh dlan kơ phung aê mdrao hgŭm hlăm bruă krŭ wĭt ai dưi hŏng bruă mdrao mgŭn čar Dak Lak mâo hlăm brô 30 čô aê mdrao, jing amâo mâo ênŭm ôh hnơ̆ng čuăn, tui si tur knơ̆ng srăng iêo mthưr klei đru mơ̆ng gưl dlông ăt msĕ hŏng sang êa drao Chợ Rẫy, leh anăn tơdah ênoh mnuih ruă lu hĭn srăng akâo kdrăp yua mơ̆ng sang êadrao jing êjai Hồ Chí Minh, sang êa drao Bình Dương mkăp kơ klei truh kjham hĭn hlăm čar.

Hlăm bruă nao ksiêm dlăng, đru kơ čar Dak Lak gang mkhư̆ klei ruă tưp hlăk hruê 27/10 mrâo leh êgao, êpul ngă bruă mơ̆ng sang êa drao Chợ Rẫy ăt kah mbha leh klei thâo, mă klei hriăm mdrao kơ mnuih mâo klei ruă tưp Covid-19. Tui si nai prĭn, aê mdrao Nguyễn Tri Thức khua kiă kriê sang êa drao Chợ Rẫy, Dak Lak čiăng bi hrŏ jih hnơ̆ng klei bi mtưp hlăm anôk mdrao gŭn, anôk bi ktlah mbĭt, bi hrŏ ênoh mnuih ruă đĭ kjham, rơ̆ng klei suaih pral, ai dưi mơ̆ng bruă mdrao mgŭn leh anăn iêo mthưr klei nao hgŭm mơ̆ng yang ƀuôn hlăm klei bi blah sui hŏng klei ruă tưp Covid-19. “Hmei mâo leh klei kčĕ mđĭ klei thâo ksiêm mkă kman. Tal 2 jing srăng tĭng kơ bruă mđĭ ênoh jhưng đih hlăm dŭm sang êa drao jing êjai mơ̆ng 4 truh kơ 5 êbâo jhưng đih, leh anăn hmei mâo klei đru kčĕ kơ anôk mdrao mgŭn hiu mdrao leh anăn dŭm hdră êlan bi ktlah F1 čiăng dêč kơ bi mtưp leh anăn dŭm klei mtă mơ̆ng phŭn bruă mdrao mgŭn, knŭk kna dưi mđĭ hnơ̆ng vaccine tlŏ mgang kơ mnuih ƀuôn sang čar Dak Lak.”

Čar Dak Lak dôk mjêč ngă dŭm hdră êlan kñăm ƀrư̆ ƀrư̆ dưi mkhư̆ leh anăn msưh kdŭn klei ruă tưp Covid-19 bluh đĭ hlăm êpul êya yang ƀuôn. Êngao kơ bruă klam mơ̆ng bruă sang čư êa, dŭm gưl bruă, dhar bruă, grăp čô mnuih ƀuôn sang čiăng ngă jăk dŭm hdră êlan gang mkhư̆ klei ruă tưp hŏng ai tiê “grăp čô mnuih ƀuôn sang jing lĭng kahan hlăm klei bi bhah hŏng klei ruă tưp Covid-19” čiăng hnưm dưi ksiêm dlăng leh anăn wĭt hŏng klei hdĭp msĕ yăng đar.