VOV4.Êđê -  Klei hưn mơ̆ng Knơ̆ng bruă mdrao mgŭn čar Dak Lak tlam hruê 26/10, brei thâo: Anôk bruă mdrao mgŭn čar dôk tuôm hŏng lu klei dleh dlan hlăm bruă blei êa drao lehanăn kdrăp mnơ̆ng yua ksieme mkă dlăng, mdrao mnuih ruă, boh nik mnuih djŏ kman Sar CoV2. Mta phŭn mơ̆ng klei anei jing kyua amâo dưi ba m’ĭt hră m’ar bi mklă čiăng blei kyua anôk bruă dăng kông hâo hưn êlan kbưi amâo ngă bruă, sang êdeh amâo êran, lu anôk bruă dôk hlăm krĭng kwang dar, bi ktlah.

Ti anăp klei anei, Knơ̆ng bruă mdrao mgŭn čar Dak Lak ngă leh hră akâo kơ Anôk bruă sang čư̆ êa čar Dak Lak hưn mdah hŏng Phŭn bruă mdrao mgŭn, Knŭk kna đru, kah mbha êa drao lehanăn kdrăp mnơ̆ng kơ alŭ wăl mkăp kơ hdră ksiêm mkă dlăng, dŏng mdrao mnuih ruă. Djŏ tuôm kơ mnuih ruă Covid 19 ti Dak Lak, tĭng mơ̆ng 4h tlam hruê 25/10 truh kơ 4h tlam hruê 26/10, kluôm čar mâo leh 150 čô djŏ kman Sar CoV2. Ƀuôn prŏng Ƀuôn Ama Thuôt ăt jing anôk mâo lu mnuih ruă hlăm êpul êya./.

H Nêč pô mblang