VOV4.Êđê - Hruê mbruê, kahan ksiêm ƀuôn prŏng Ƀuôn Ama Thuôt, čar Dak Lak mâo leh klei bi klă, kčŭt hưn klei ngă soh, dưn yua asăp amâo dưi kƀiă đuê̆ mơ̆ng alŭ wăl hŏng Đỗ Thanh Hải, 36 thŭn, dôk ti ƀuôn hgŭm Tân Lợi, ƀuôn prŏng Ƀuôn Ama Thuôt, čar Dak Lak. Pô anei dưi kcŭt hưn kyua klei soh “Ngă tưp lar klei ruă jŭ jhat kơ anak mnuih” tui si êlan 1 mta 240 klei bhiăn kcŭt hưn phung ngă soh. Tui sui klei ksiêm duah mơ̆ng kahan ksiêm, Đỗ Thanh Hải jing sa čô ngă bruă kiă kriê adŭ bruă sang êdeh Tiến Oanh ti mrô sang 134 êlan Hai Bà Trưng, ƀuôn hgŭm Thắng Lợi, ƀuôn prŏng Ƀuôn Ama Thuôt. Mlam hruê 10/7, pô anei mbĭt hŏng 2 čô mkăn đĭ hlăm sa boh êdeh mâo mrô 50H-052.70 mơ̆ng ƀuôn prŏng Hồ Chí Minh wĭt kơ ƀuôn prŏng Ƀuôn Ama Thuôt, mmông anăn ti ƀuôn prŏng Hồ Chí Minh jing anôk mâo klei ruă tưp. Leh wĭt kơ sang êdeh, pô anei amâo nao ôh anôk bruă mdrao mgŭn hưn mdah msĕ hŏng klei bhiăn leh anăn duah hiu lu anôk ti ƀuôn prŏng Ƀuôn Ama Thuôt, bi tuôm hŏng lu mnuih mkăn.

Y Ƀel pô mblang