VOV4.Êđê - Hruê 28/10, čar Dak Lak yap lŏ mâo thiăm 126 čô ruă Covid-19, hlăm anăn mâo truh 39 čô hlăm êpul êya. 126 čô ruă Covid-19 mrâo leh anăn 39 čô ƀuh hlăm êpul êya ti čar Dak Lak kƀĭn lu ti dŭm kdriêk Čư̆ Mgar, Krông Ƀuk, wăl krah Ƀuôn hồ leh anăn ƀuôn prŏng Ƀuôn Ama Thuôt. Anei ăt jing dŭm alŭ wăl mâo lu mnuih ruă hlăm êpul êya hlăm 1 hruê kăm êgao leh anăn dŭm phung ruă lu jing djŏ tuôm kơ phung wĭt mơ̆ng krĭng mâo klei ruă tưp ti dŭm čar nah Dhŭng. Lu să, ƀuôn hgŭm ti dŭm alŭ wăl anei mđĭ hnơ̆ng pral snăk mơ̆ng gưl 1, gưl 3 jing gưl 3, gưl 4,  jing mơ̆ng krĭng mtah ka mâo mnuih ruă jing mâo mnuih ruă lu leh anăn huĭ hyưt.  Bruă mdrao mgŭn čar Dak Lak dôk gĭr ktưn ksiêm dlăng, hiu duah, pŏk ngă bruă bi ktlah hjăn mdrao mgŭn leh anăn mă mta ksiêm mkă phung tuôm bi tuôm giăm hŏng mnuih ruă, ƀuh F0 hlăm êpul êya.

Djŏ tuôm kơ klei ruă Covid-19 ti Dak Lak dleh ktuê dlăng, huê 28/10, Knơ̆ng bruă sang čư̆ êa čar Dak Nông mâo leh hră mơar mjêč kčah mơ̆ng hruê 29/10, knuă druh leh anăn mnuih mă bruă ti Dak Nông amâo dưi hriê amâo wĭt ôh ti Dak Lak hlăm 14 hruê, êngao kơ phung nao mă bruă amâodah mâo klei tŭ ư mơ̆ng anôk bruă mâo klei dưi.

H Zawut pô mblang