VOV4.Êđê -  Leh ƀuôn prŏng Hồ Chí Minh leh anăn dŭm čar nah Dhŭng bi êdu klei kwang dar, mơ̆ng hruê 2 truh aguah 4/10, čar Dak Lak tŭ jum giăm 7000 čô mnuih ƀuôn sang wĭt mơ̆ng dŭm čar nah Dhŭng. Hdră pŏk ngă klei ksiêm mkă pral kman kơ phung wĭt anei ƀuh leh 14 čô djŏ kman klei ruă.

Hlăm ênoh giăm 7000 čô mnuih ƀuôn sang ti dŭm čar nah Dhŭng čŏng wĭt ti Dak Lak, truh aguah 4/10, bruă mdrao mgŭn Dak Lak pŏk ngă leh klei mă mta ksiêm mkă test pral kơ 6000 čô mnuih. Mơ̆ng anăn ƀuh 14 čô djŏ kman klei ruă, mâo 0,2%. Dŭm mta anei dưi mơĭt kơ CDC čar leh anăn Anôk ksiêm dlăng klei ruă tưp Lăn Dap Kngư ksiêm mkă hŏng Realtime-PCR. Mơ̆ng bruă mbha mnuih ƀuôn sang, hlăm ênoh êbeh 7000 čô mnuih wĭt ti čar mâo giăm 60% čô mnuih tlŏ leh vaccin gang mkhư̆ klei ruă Covid-19 aruăt tal 1, ênoh tlŏ leh aruăt tal 2 mâo êbeh 9%, leh anăn 764 čô F0 mdrao leh klei ruă Covid-19 dưi kbiă mơ̆ng sang êa drao, mâo 11%.

H Zawut pô mblang