VOV4.Êđê - Anôk bruă sang čư̆ êa čar Dak Lak mrâo ba mdah Hră mtrŭn kơ bruă mkŏ mjing hdră mtô bi hriăm mơ̆ng hruê 4-10-2021. Hluê anăn, hŏng dŭm alŭ wăl dưi bi mklă “Krĭng mtah” ti gưl hđeh điêt dưi brei phung hđeh 5 thŭn nao sang hră hŏng klei mgrơ̆ng jing phung nai mtô ăt dôk ti “Krĭng mtah” mơh, dŭm gưl thŭn dưi mdei nao sang hră truh kơ hbĭl mâo klei hưn mthâo mrâo. Hŏng dŭm alŭ wăl dôk hlăm “Krĭng knĭ” lehanăn “Krĭng hrah mda”, “Krĭng hrah”, gưl hđeh điêt dưi mdei truh kơ hbĭl mâo klei hưn mthâo mrâo, mơ̆ng gưl sa kơ dlông lŏ dơ̆ng mtô bi hriăm hluê hdră online, mđung rung, jao klei hriăm dlăng ti sang.

Knơ̆ng bruă Sang hră m’ar mtô bi hriăm čar Dak Lak gĭt gai, bi hgŭm hŏng Knơ̆ng bruă mdrao mgŭn, Anôk bruă sang čư̆ êa dŭm kdriêk, wăl krah, ƀuôn prŏng gĭt gai dŭm anôk bruă mtô bi hriăm hluê ngă kjăp klei mtrŭn anei, mtă kơ phung nai mtô, knuă druh mă bruă ktrâo lač kơ phung amĭ ama, phung hđeh hluê ngă kjăp hdră gang mkhư̆ klei ruă Covid 19 mbĭt anăn mâo hdră mprăp kơ djăp klei amâo jăk huĭ bluh mâo./.

H Nêč pô mblang