VOV4.Êđê- Klei ruă Covid 19 dôk mâo dleh dưi ksiêm dlăng, bruă mtô bi hriăm brei rơ̆ng kjăp klei êđăp ênang hlăm hdră gang mkhư̆ klei ruă tưp lehanăn brei bi leh dŭm mta kñăm mâo kčah mtrŭn hlăk dôk ngă kơ dŭm sang hră ti Dak Lak tuôm hŏng lu klei dleh dlan, lông dlăng. Pral kdal, mâo hdră bi mlih djŏ guôp hŏng klei dôk mâo hlăk mâo leh anôk bruă mtô bi hriăm Dak Lak hluê ngă čiăng bi leh jih dua mta kñăm.

Leh wưng giăm 3 hruê kăm hluê ngă bruă mtô bi hriăm online, phung nai leh anăn hđeh sang hră hđeh điêt wăl krah Phước An, kdriêk Krông Pač, čar Dak Lak hơ̆k mơak, čang guôn leh hmư̆ klei hâo hưn mơ̆ng hruê 4-10 phung hđeh krĭng amâo mâo mnuih ruă dưi lŏ wĭt ti sang hră. Khădah knŏng leh 1 hruê nao sang hră, Knơ̆ng bruă sang čư̆ êa kdriêk bi mklă brei mdei nao hriăm online, lŏ wĭt hriăm amâo tlă anăp kyua klei ruă tưp dleh ktuê dlăng. Nai Trần Thị Nga, Khua sang hră hđeh điêt wăl krah Phước An brei thâo, amâo ƀuh ôh klei bi kngăr, amâodah kdjăt hlăm klei anei:

“Sang hră hđeh điêt wăl krah dôk hlăm klei mprăp drông phung hđeh nap sang hră. Sang hră kih mdoh leh sang hră, adŭ hriăm, mkŏ mjing kơ phung nai bi msiam hluê si akŏ hriăm. Sang hră hâo hưn truh kơ jih jang phung nai, knuă druh mnuih mă bruă kơ hdră gang mkhư̆ klei ruă tưp hluê si hră mơar gĭt gai mơ̆ng gưl dlông. Mkŏ mjing kơ phung nai mkra video bi hriăm kơ phung hđeh klei dưi hdĭp, kơ hdră gang mkhư̆ klei ruă tưp leh anăn dŭm klei mtô bi hriăm kơ phung hđeh ti gŭ 5 thŭn mơĭt kơ phung amĭ ama čiăng kơ phung amĭ ama ksiêm dlăng leh anăn bi hriăm anak ti sang”.

Sa adŭ hriăm online ti wăl krah Phước An, kdriêk Krông Pač

           Hŏng dŭm gưl hriăm prŏng msĕ si: Gưl 2, gưl 3, anôk bi hriăm nanao, êngao kơ bruă ngă jăk klei mtă gang mkhư̆ klei ruă tưp, dŭm sang hră pral ruah hdră mtô bi hriăm, mkra mlih hdră bi hriăm hluê wưng, grăp alŭ wăl bi djŏ guôp, tŭ dưn. Nai Đặng Như Sang, k’iăng Khua sang hră gưl 2 Phước An, wăl krah Phước An, kdriêk Krông Pač, čar Dak Lak brei thâo:

“Khua sang hră jiă kma leh klei mĭn “Mdrơ̆ng hŏng klei ruă tưp msĕ si bi kdơ̆ng hŏng phung roh” mprăp ai tiê bi mlih bruă hruê anei dôk hriăm tlă anăp ƀiădah tơdah mâo klei bi mlih hmei srăng hriăm online mtam. Hlăm wưng hriăm tlă anăp hmei srăng mñă kơ phung nai mtô hnêč ba yua mmông yuôm bhăn čiăng bi hriăm sa anôk snăn phung nai mtô klei hriăm klă klơ̆ng hĭn, mta phŭn kơ phung hđeh sang hrăm bi wưng bi mlih hriăm online snăn srăng yua jih mmông hriăm anăn lŏ bi hdơr, pŏk mlar, mñă klei thâo kơ phung hđeh”.

 Bi ti kdriêk krĭng taih kbưi Krông Bông, Êpul hgŭm Đội kdriêk Krông Bông mkŏ mjing adŭ hriăm “Čhiăm hrah” kyua êpul êdam êra, hđeh hriăm hră bi hriăm kơ grăp êpul hđeh ti anôk dôk mtam. Êbeh sa mlan hŏng anei, êngao kơ bruă hriăm online, đa đa phung sinh viên hlăm Sang hră gưl prŏng Đà Nẵng, grăp hruê lŏ drông phung hđeh gưl sa wĭt ti sang pô čiăng mtô bi hriăm. Anei jing phung hđeh mâo klei hdĭp dleh dlan amâo mâo maĭ tĭng, đĭng blŭ thâo mĭn čiăng hriăm online. Hđeh sang hră Nguyễn Bính Phước brei thâo, kyua klei ruă Covid-19 anăn ñu amâo dưi nao ti Đà Nẵng ôh, ƀiădah hriăm online. Êngao kơ mmông hriăm, ñu lŏ đru kơ adŭ hruăm “Čhiăm hrah”.

“Dưi thâo ti kdriêk mâo pŏk ngă adŭ hriăm Čhiăm hrah čiăng đru kơ phung hđeh mâo klei hdĭp dleh dlan amâodag djăp klei găl hriăm online. Kâo čih anăn mguô ƀiă ai tiê pô čiăng đru kơ phung hđeh hriăm online hlăm yan klei ruă tưp dleh dlan anei. Leh ƀuh phung hđeh hriăm grăp hruê kâo mơak kyua phung hđeh dưi hriăm djăp ênŭm klei hriăm”.

Adŭ hriăm “Čhiăm hrah” ti kdriêk Krông Bông.

Krông Bông jing krĭng taih kbưi dleh dlan ti čar Dak Lak. Ti alŭ wăl anei, leh klei ruă Covid-19 dưi mkhư̆, hđeh sang hră gưl 3 ndưi nao sang hră. Hjăn phung hđeh gưl sa ăt hriăm online. Ayŏng Bùi Tấn Lợi, Khua Êpul hgŭm phung hđeh kdriêk Krông Bông brei thâo: bruă mkŏ mjing dŭm boh adŭ hriăm “čhiăm hrah” ti dŭm alŭ, ƀuôn kñăm đru kơ phung hđeh hriăm hră hlăm yan klei ruă tưp. Hluê anăn, phung čŏng ngă bruă nao ti sang hđeh sang hră amâodah bi kƀĭn 2 -3 čô wĭt kơ sang pô čiăng mtô bi hriăm phung hđeh hriăm hră leh anăn hluê ngă djăp klei kčah mtrŭn gang mkhư̆ klei ruă Covid-19.

“Anei jing adŭ hriăm hmao đru kơ phung hđeh. Phung čŏng ngă bruă jing phung êdam êra, hđeh hriăm hră, phung nai mtô dlăng bruă đội djă maĭ tĭng, đĭng blŭ nao ti sang phung hđeh. Ară anei, hmei dôk mđĭ lar 10 adŭ hriăm. Anei jing rgu hmô mrâo leh anăn yuôm bhăn hlăm wưng ară anei leh anăn wưng kơ anăp.”

            Ti anăp klei ruă tưp dleh ktuê dlăng, Knơ̆ng bruă sang čư̆ êa čar Dak Lak jao klei dưi kơ dŭm alŭ wăl čŏng bi mklă hdră mtô bi hriăm djŏ guôp. Lê Thị Kim Oanh, K’iăng Khua Knơ̆ng bruă sang hră - mtô bi hriăm čar Dak Lak brei thâo, bruă sang hră Dak Lak thâo săng djăp ênŭm klei dleh dlan leh anăn lông dlăng hlăm boh klei ruă tưp lŏ mâo dleh ktuê dlăng leh anăn sui. Knơ̆ng bruă kčĕ kơ Knơ̆ng bruă sang čư̆ êa čar mđing djăp hdră msir čiăng bi mlih boh klei mdrơ̆ng leh anăn bi hrŏ dŭm klei hmaĭ amâo jăk kơ bruă sang hră, mơ̆ng tur knơ̆ng amâo bi mlih hdră kñăm rơ̆ng hnơ̆ng jăk.

“Nah êngao dŭm sang hră pral hlăm hdră gang mkhư̆ klei ruă tưp snăn leh, lŏ mâo bruă pral mkŏ mjing lu hdră hriăm mdê mdê čiăng djăp boh klei ăt dưi bi mlih hdră mtô bi hriăm djŏ guôp. Mơ̆ng anăn čiăng bruă pŏk ngă bruă klam mdua mdrơ̆ng hŏng klei ruă tưp êjai rơ̆ng dŭm bruă mtô bi hriăm mơ̆ng sang hră hluê si hdră kčah”.

 Hŏng klei thâo pral, mbruă čiăng mdrơ̆ng hŏng klei ruă Covid-19, bruă sang hră - mtô bi hriăm Dak Lak dôk gĭr rơ̆ng djăp klei êđăp ênang leh anăn hnơ̆ng jăk hlăm thŭn hriăm mrâo hŏng hdră jăk hĭn./.

Pô mblang: H’Zawut Ƀuôn Yă