VOV4.Êđê- Khă wưng hriăm thŭn 2021-2022 mâo leh krah wah gưl hriăm tal 1, ƀiădah truh kơ ară anei, mâo lŭ phung hđeh sang hră mơ̆ng Dak Lak dôk đuôm hlăm dŭm alŭ wăl, ka dưi nao sang hră leh anăn ăt mâo lu hđeh sang hră čar mkăn dôk hriăm êjai ti čar Dak Lak. Čiăng rơng klei jăk kơ phung hđeh sang hră, knơ̆ng bruă mtô mjuăt bi hriăm čar Dak Lak dôk mkŏ mjing klei găl hĭn čiăng kơ phung hđeh amâo mâo klei kpăk hlăm klei hriăm hră mơar khă dôk ti anôk mkăn.

Tui si knơ̆ng bruă mtô mjuăt bi hriăm čar Dak Lak, leh giăm sa mlan mơ̆ng hruê phung hđeh kčưm mŭt hlăm thŭn hriăm mrâo, truh kơ ară anei, ăt mâo giăm 1.270 čô hđeh mơ̆ng čar Dak Lak kă dưi lŏ wĭt hriăm leh anăn êbeh 660 čô hđeh dŭm alŭ wăl mkăn dôk hriăm êjai ti čar Dak Lak. Bi kơ dŭm čô anei, knơ̆ng bruă gĭt gai brei drông jum, ngă klei găl čiăng phung hđeh hriăm online amâodah klă anăp.

Pô mblang: Y-Ƀel Êban