VOV4.Êđê- Hlăm ênoh êbeh 1.700 čô ruă Covid 19 ti čar Dak Lak amâo djŏ ƀiă ôh pô ruă jing phung mniê ba tian dơ̆ng truh leh hruê kkiêng. Phung hđeh kkiêng hlăm wưng dôk bluh mâo klei ruă Covid 19 mdê êdi, kyua lŏ mâo thiăm phung amĭ jing phung nai aê mdrao, bŏ hŏng klei khăp čiăng lehanăn klei đua klam.

Wăt tơdah mđing ktuê dlăng klei suaih pral phung hđeh điêt, amai Buì Tuị Thu Hương, pô mdrao mgŭn anôk mdrao kơ hđeh điêt krŭ wĭt klei suaih pral phung hđeh mrâo kkiêng, Sang êa drao prŏng krĭng Lăn Dap Kngư dlăng kơ mmông. Truh 3 mmông tlam, ñu mă giêt êa ksâo mdjiê leh kman, nao akâo ê ksâo phung amĭ mrâo kkiêng dôk kriê dlăng anak, leh anăn ba êa ksâo dưi akâo leh kơ phung hđeh mrâo kkiêng mâo amĭ jing FO dôk mdrao mgŭn tinei. Êngao kơ akâo êa ksâo kơ phung hđeh mam, amai Hương hŏng ƀĭng mă bruă lŏ bi mlih tuôr mnei, mlih hnun, ksiêm dlăng klei suaih pral kơ phung hđeh. Amai brei thâo, yap mơ̆ng leh phung hđeh mrâo kkiêng mâo amĭ jing F0 hriê đih mdrao ti Anôk mdrao kơ phung hđeh čiăng mdrao mgŭn leh anăn kriê dlăng, snăn sa gŏ sang mrâo mâo tinei. Phung mniê đru mdrao mgŭn jing mnuih mâo anak điêt, hruê mlam kriê dlăng phung anak:

“Phung hđeh anăn snăn amâo mâo klei amĭ pŭ hlăm kiê kngan ôh snăn phung hđeh amâo myun ôh anăn jih jang phung aê mdrao tinei dlăng phung hđeh msĕ si anak čô pô, čiăng kriê dlăng ba klei khăp hrô kơ amĭ phung hđeh anăn jăk hĭn, Kyua amĭ digơ̆ bi ktlah hjăn snăn amâo dưi mă êa ksâo ba kơ anak ôh, hmei hlăm anôk anei akâo êa ksâo phung amĭ mâo lu êa ksâo kơ phung hđeh rơ̆ng kơ digơ̆ dưi mam êa ksâo amĭ.”

Pô ngă bruă mdrao mgŭn Hương dôk kriê dlăng kơ hđeh hlăm adŭ bi ktlah hjăn

 Mbĭt hŏng klei kriê dlăng phung hđeh mrâo kkiêng ti Anôk mdrao krŭ wĭt klei suaih pral, pô mdrao mgŭn Dương Thị Hoa ktuê dlăng klei suaih pral phung hđeh êjai, mprăp dŭm klei găl lŏ drông thiăm 2 čô hđeh mrâo kkiêng mâo amĭ jing F0. Amai Hoa brei thâo, mbĭt hŏng klei răng jih hnơ̆ng hlăm hdră gang mkhư̆ klei ruă tưp, phung mniê ngă bruă mdrao mgŭn leh anăn êpul mă bruă hlăm anôk bruă lŏ mđing dlăng kơ bruă mprăp êa ksâo amĭ, čiăng phung hđeh mâo klei suaih pral jăk, djăp mnơ̆ng tŭ jăk čiăng hriê kơ prŏng hlăm dŭm mlan akŏ klei hdĭp:

“Êa ksâo amĭ snăn ară anei mâo phung kăp đru brei êa ksâo bi êăt, leh anăn hmei bi jih êăt leh anăn bi hlơr êa ksâo kơ ĕ mam. Tơdah mâo êa ksâo phung amĭ brei kơ phung hđeh hlăm adŭ êbeh snăn pô pioh kơ phung hđeh mam, bi tơdah amâo djăp snăn bi hlơr êa ksâo êăt dih kơ phung hđeh mam thiăm.”

Pô ngă bruă mdrao mgŭn Hoa gĭr duah êa ksâo amĭ kơ phung hđeh mam čiăng mđĭ ktang klei suaih pral

 Hluê si aê ndrao Chuyên khoa II Nguyễn Đức Toàn, Anôk mdrao krŭ wĭt klei suaih pral phung hđeh điêt, sang êa drao prŏng krĭng Lăn Dap Kngư, bruă kriê dlăng phung hđeh mrâo kkiêng mâo amĭ jing F0 mâo anôk bruă dăp 2 wăl mdê hjăn, jing wăl kriê dlăng klei suaih pral aguah tlam leh anăn wăl kriê dlăng bi ktlah hjăn. Hluê anăn, leh mrâo kkiêng, arăng srăng ba phung hđeh hlăm wăl bi ktlah hjăn čiăng kriê dlăng leh anăn mdrao mgŭn. Leh 14 hruê, tơdah klei suaih pral phung hđeh jăk leh anăn 3 blư̆ ksiêm mkă amâo djŏ ôh kman SARS –CoV -2 hŏng hdră RT-PCR srăng dưi ba hlăm wăl kriê dlăng aguah tlam čiăng dôk guôn amĭ leh anăn găp djuê mdrao hlao klei ruă Covid-19 drông wĭt. Aê mdrao Nguyễn Đức Toàn brei thâo, khă gơ̆ ênoh phung hđeh mrâo kkiêng brei kriê dlăng mdê hĭn amâo lu ôh, ƀiădah hlăm klei huĭ kơ klei ruă Covid-19, phung mdrao mgŭn tinei ăt răng jih ai tiê mơh:

“Bruă kriê dlăng sa čô hđeh amâo mâo găp djuê jing suăi snăk, hrô kơ phung hlăm sang mâo amĭ snăn dưi ƀiă, bi anei jing kriê dlăng kluôm dhuôm, dôk hlăm wăl bi ktlah hjăn kyua anăn phung ngă bruă mdrao mgŭn êrô wĭt êrô nao čiăng dlăng, tơdah amâo ngă snăn srăng mâo klei truh kjham pô amâo hmao msir mgaih. Kyua anăn kriê dlăng sa čô hđeh djŏ hĕ klei ruă Covid anei mdrăng hŏng 3 čô hđeh dŏng mdrao mjêč, kyua anăn bruă phung mdrao mgŭn êmăn leh anăn suaĭ snăk.”

 Kkiêng ti krah yan klei ruă Covid-19, bi ktlah hŏng amĭ kkiêng mơ̆ng leh mrâo kkiêng, jing klei amâo myun mơ̆ng phung hđeh mrâo kkiêng. Ƀiădah ti sang êa drao krĭng Lăn dap Kngư, phung hđeh mâo phung aê mdrao - pô kriê dlăng răng mgang. Phung hđeh msĕ hŏng pô mkăn mơh ƀiădah mdê hjăn, ăt dưi hriê kơ prŏng grăp hruê hlăm kiê kngan klei khăp hơiêng.

Pô mblang: H’Zawut Ƀuôn Yă