VOV4.Êđê- Dŭm klei hmăi mơ̆ng klei ruă tưp Covid-19 ngă truh klei amâo mâo jăk kơ bruă duh mkra ala ƀuôn čar Dak Lak. Ƀiădah mâo klei gĭr jih ai mơ̆ng bruă Đảng čar, bruă sang čư̆ êa, mnuih ƀuôn sang, čar Dak Lak dưi mâo leh dŭm boh tŭ dưn hlăm bruă gang mkhư̆ klei ruă tưp Covid-19. Dŭm alŭ wăl hlăm čar ăt ƀrư̆ ƀrư̆ hlăm bruă mlih mrâo, hdĭp êđăp ênang hŏng klei ruă tưp Covid-19 čiăng bi hơĭt, kơrŭ wĭt bruă duh mkra, rơ̆ng klei hdĭp yang ƀuôn hlăm wưng mrâo.

Jing 1 hlăm dŭm alŭ wăl mâo 22 čô djŏ klei ruă Covid-19 ti alŭ 6 leh anăn alŭ 7, să Vụ Bổn, kdriêk Krông Pač hlăm klei ruă tưp tal 4, ƀiădah hŏng ai tiê hluê ngă klei gĭt gai mơ̆ng Khua Knŭk kna: “Grăp să, ƀuôn hgŭm jing sa kđông, grăp êpul, boh nik êpul gang mkhư̆ klei ruă tưp êpul êya jing anôk phŭn”, Bruă Đảng, bruă sang čư̆ êa leh anăn mnuih ƀuôn sang să Vụ Bổn pral ktuê dlăng boh klei, mkhư̆ klei ruă tưp, mjing klei găl kơ bruă duh mkra- ala ƀuôn alŭ wăl lŏ dơ̆ng mđĭ kyar. Lê Viết Nhượng, Khua dlăng bruă Đảng, Khua Anôk bruă gĭt gai gang mkhư̆ klei ruă Covid-19 să Vụ Bổ, kdriêk Krông Pač, čar Dak Lak brei thâo:

“Să mă bruă gang mkhư̆ klei ruă tưp jing mrô sa. Klei mĭn gĭt gai kơ hdră kñăm mdua jing gang mkhư̆ klei ruă tưp ƀiădah mbĭt anăn ăt đru kơ bruă mkra mjing mđĭ kyar. Hlăm wưng êgao, hluê ngă klei Khua knŭk kna gĭt gai snăn să bi leh Anôk bruă gĭt gai leh anăn mkŏ mjing mrâo Anôk bruă gĭt gai gang mkhư̆ klei ruă tưp leh anăn mbŏ hdră gang mkhư̆ klei ruă tưp hlăm boh klei mrâo. Hlăm anăn mâo bruă hluê ngă hdră kñăm mdua, mjing klei găl kơ mnuih ƀuôn sang mkra mjing”

 Ti kdriêk Ea Hleo, čar Dak Lak čih yap leh lu mnuih djŏ kman SARS-CoV-2, hlăm anăn mâo lu mnuih ruă hlăm êpul êya hmaĭ kơ bruă duh mkra, mnia blei, duh bi liê leh anăn klei hdĭp mnuih ƀuôn sang. Mơ̆ng klei mĭn rŭng răng tal êlâo, truh ară anei hŏng klei ngă bruă jih ai tiê mơ̆ng bruă kđi čar hŏng klei gĭr ktưn dŭm gưl mnuih ƀuôn sang, kdriêk Ea Hleo pral ktuê dlăng boh klei ruă tưp, mbĭt anăn hluê ngă tŭ dưn lu hnơ̆ng kčah mđĭ kyar bruă duh mkra- ala ƀuôn 9 mlan thŭn 2021. Truh mmông anei, kdriêk iêô mthưr 21 hdră ngă bruă duh bi liê hlăm alŭ wăl hŏng ênoh bi liê mĭn tĭng giăm 2.500 êklai prăk. Kyua anăn, hŏng bruă rơ̆ng êđăp ênang klei ruă tưp, snăn bruă klam krơ̆ng hơĭt kjăp bruă kđi čar, mđĭ kyar bruă duh mkra hlăk mâo jih bruă kđi čar, mnuih ƀuôn sang leh anăn anôk bruă mnia blei mđing dlăng. Vũ Đình Tân, Khua Knơ̆ng bruă pui kmlă bi êran hŏng angĭn Trung Nam - Dak Lak 1, anôk bruă duh mkra mâo hdră dôk pŏk ngă ti kdriêk Ea Hleo brei thâo:

“Ară anei, hdră hlăk mŭt hlăm wưng mâo lu bruă dŭ mdiăng, mkŏ dăp. Hŏng bruă mkŏ mjing snăn nah knơ̆ng bruă pral pŏk ngă, boh nik dŭm anôk ka jăk snăn rŭ mdơ̆ng tuh bêtông kluôm dhuôm. Kyua anăn, bruă kơ yan adiê snăn amâo hmaĭ ôh kơ bruă rŭ mdơ̆ng leh anăn mkŏ dăp. Knŏng mâo ară anei jing ti anăp klei ruă tưp snăn knơ̆ng bruă pral bi blŭ hrăm hŏng phung thơ̆ng kơ bruă ala tač êngao ngă hră mơar wĭt kơ Việt Nam hnưm leh anăn bi ktlah hjăn, rơ̆ng dŭm klei Knŭk kna kčah mtrŭn. Mbĭt hŏng anăn snăn hŏng phung knuă druh, mnuih mă bruă hlăm knơ̆ng bruă dưi mtă jing nao ti anôk mă bruă leh anăn wĭt ti anôk dôk brei hưn klei suaih pral”

Mnuih ƀuôn sang Dak Lak gĭr mă bruă mkra mjing leh anăn hluê ngă bi jăk dŭm hdră kčah gang mkhư̆ klei ruă tưp

        Hluê si Phạm Minh Tấn, K’iăng Khua bruă Đảng čar Dak Lak: klei ruă Covid-19 hmaĭ lu snăk kơ klei hdĭp mnuih ƀuôn sang leh anăn klei đĭ kyar mbĭt kluôm ala ƀuôn, hlăm anăn mâo čar Dak Lak. Ƀiădah, hŏng klei gĭr jih ai tiê mơ̆ng Đảng, jih jang mnuih ƀuôn sang, truh ară anei boh klei ruă tưp ti alŭ wăl čar ngă leh, leh anăn hlăk dưi ktuê dlăng leh anăn msưh kdŭn. Dŭm hnơ̆ng kčah bruă duh mkra- ala ƀuôn 9 mlan êgao ăt đĭ mkă hŏng wưng anei thŭn 2020. Mđĭ kyar bruă duh mkra mơ̆ng 9 mlan mâo 5,28%. Ênoh prăk hrui wĭt knŭk kna ti čar mâo 5.500 êklai prăk, mâo 74,5% mĭn tĭng Êpul gơ̆ng mnuih ƀuôn sang čar jao, đĭ 3% mkă hŏng wưng anei thŭn dih. Khădah, čiăng hluê ngă tŭ dưi dŭm bruă klam thŭn 2021 hluê si Hdră mtrŭn Bruă Đảng jao, hlăm wưng kơ anăp, dŭm gưl bruă Đảng, bruă sang čư̆ êa, êpul hgŭm, dŭm anôk bruă, alŭ wăl hlăm čar ăt lŏ dơ̆ng ktuê dlăng boh sĭt, kčah dŭm hdră msir, mkŏ mjing bruă, tŭ dưn hŏng jih ai tiê, mguôp hŏng bruă gang mkhư̆ klei ruă tưp hŏng klei mđĭ kyar bruă duh mkra- ala ƀuôn, rơ̆ng êđăp ênang ala čar. Phạm Minh Tấn, K’iăng Khua bruă Đảng čar Dak Lak mñă klă:

“Klei ruă Covid-19 giăm 2 thŭn anei hmaĭ lu snăk kơ klei đĭ kyar bruă duh mkra- ala ƀuôn, ƀiădah drei ăt dưm mrô sa klei tŭ dưi, klei tŭ dưn djŏ klă kơ mnuih ƀuôn sang leh anăn hluê ngă djŏ klei Gưl dlông, Knŭk kna gĭt gai jing hluê ngă hdră kñăm mdua, mđĭ kyar bruă duh mkra ala ƀuôn êjai, rơ̆ng gang mkhư̆ klei ruă Covid-19 leh anăn dŭm mta bruă mnia blei mkăn. Amâo ngă ngơi mang, brei thâo răng čiăng mjing klei găl jăk hĭn čiăng drei kƀĭn djăp klei găl hơĭt bruă kđi čar, mđĭ kyar bruă duh mkra ala ƀuôn, rơ̆ng klei êđăp ênang ala čar, mkŏ mjing bruă kđi čar kluôm čar.

 Hŏng ai tiê hluê ngă tŭ dưn hdră kñăm mdua kơ hdră gang mkhư̆ klei ruă Covid-19 tŭ dưn leh anăn bi leh dŭm hdră kñăm kơ klei mđĭ kyar bruă duh mkra- ala ƀuôn hlăm thŭn 2021, bruă Đảng, bruă sang čư̆ êa leh anăn mnuih ƀuôn sang dŭm djuê ana čar Dak Lak ƀrư̆ pral bi mlih hluê si Hdră mtrŭn kčah mtrŭn êjai “Mdơ̆ng êđăp ênang, mbruă, ktuê dlăng tŭ dưn klei ruă Covid-19”./.

Pô mblang: H’Zawut Ƀuôn Yă