VOV4.Êđê- Čar Dak Lak ară anei dôk mâo 19 sang bi êran pui kmlă hŏng ai êa, mâo hnơ̆ng pui kmlă kluôm 852 Mw, dưi bi kdơ̆ng êbeh 1 êklai 300 êklăk m³ êa. Ară anei jing dôk hlăk hlê hlăm wưng hjan prŏng, dŭm sang bi êran pui kmlă hŏng ai êa bi mguop leh hŏng dŭm anôk bruă djŏ tuôm čiăng mprăp dŭm hdră êlan rơ̆ng klei êđăp ênang knơ̆ng mkăp êa leh anăn bruă bi êran, mkra mjing pui kmlă mâo boh tŭ dưn, boh nik hlăm wưng klei ruă tưp Covid-19 dôk dleh dưi ksiêm dlăng.

Tui si Trương Công Hồng, Kơiăng khua kiă kriê knơ̆ng bruă tuh tia čar Dak Lak, hlăm klei ksiêm dlăng hnơ̆ng êa êlâo kơ yan hjan hlĭm. Dŭm knơ̆ng mkăp êa ngă ênŭm leh anăn ngă djŏ dŭm hdră êlan bi mdrơ̆ng kơ bruă ksiêm dlăng, rơ̆ng klei êđăp ênang knơ̆ng mkăp êa, ênao êa, mkŏ mjing dŭm hdră êlan bi mdrơ̆ng hŏng klei hjan hlĭm, bi êran pui kmlă êđăp ênang, bi mguôp hŏng dŭm alŭ wăl rơ̆ng kơ bruă pŏk mđuê̆ êa tĭng nah tluôm.

Pô mblang: Y-Ƀel Êban