VOV4.Êđê - Klei hâo hưn mơ̆ng Anôk bruă gĭt gai gang mkhư̆ klei ruă Covid-19 mơ̆ng čar brei thâo, yap truh ară anei, čar Dak Lak mâo leh 12 gưl mkăp vaccin Covid-19 mơ̆ng Phŭn bruă mdrao mgŭn hŏng êbeh 1.230.000 aruăt vaccin hlăm ênoh êbeh 2 êklăk 7 êtuh êbâo aruăt čiăng, kơ êbeh 1 êklăk 4 êtuh êbâo čô mnuih êbeh 18 thŭn ti alŭ wăl. Yap truh hruê 8/11, kluôm čar Dak Lak tlŏ leh 1 êklăk 128 êbâo aruăt vaccin, hlăm anăn, aruăt tal 1 êbeh 993 êbâo aruăt, mâo êbeh 70% leh anăn aruăt tal 2 êbeh 128 êbâo aruăt, mâo 9%. 

Mâo 5/15 alŭ wăl gưl kdriêk tlŏ aruăt tal 1 êbeh 80%, mâo ƀuôn prŏng Ƀuôn Ama Thuôt (84,8%), kdriêk Krông Ƀuk (84,7%), kdriêk Ea Hleo (86,7%), kdriêk Čư̆ Kuin (84,4%) leh anăn wăl krah Ƀuôn Hô (80,1%).  Nay Phi La,  Khua Knơ̆ng bruă mdrao mgŭn čar Dak Lak brei thâo, čiăng rơ̆ng truh knhal jih thŭn 2021 Dak Lak srăng dưi tlŏ vaccin  hŏng êbeh 80% ênoh mnuih ƀuôn sang mơ̆ng 12 thŭn kơ dlông, čar čiăng thiăm 1 êklăk 890 êbâo aruăt, hlăm anăn klei čiăng tlŏ hlăm mlan 11 êbeh 1 êklăk aruăt leh anăn mlan 12 667.600 aruăt.

H Zawut pô mblang