VOV4.Êđê - Ti ƀuôn prŏng Ƀuôn Ama Thuôt, knơ̆ng bruă mdrao mgŭn čar Dak Lak tŭ mă leh 5 boh êdeh hiu tlŏ mgang vaccine mơ̆ng knơ̆ng bruă otô THACO Trường Hải mkăp brei đru kơ bruă gang mkhư̆ klei ruă tưp Covid-19 dôk dleh dưi ksiêm dlăng hlăm alŭ wăl anei. Êdeh anei dưi mkra mjing djŏ guôp hlăm bruă tlŏ mgang êđăp ênang, mâo boh tŭ dưn hlăm dŭm anôk dleh êrô êbat, mbĭt anăn lŏ dưi yua hlăm bruă hiu mă mta ksiêm mkă kman. Hlăm êdeh anăn mâo huôm kriê pioh vaccine mâo kdrăp ksiêm dlăng hnơ̆ng hlơr kriê pioh vaccine.

Knơ̆ng bruă mdrao mgŭn čar Dak Lak brei thâo: Hlăm 1 êklăk 362 êbâo 176 čô mơ̆ng 18 thŭn kơ dlông, čar Dak Lak knŏng mâo tlŏ mă aruăt tal 1 hŏng hnơ̆ng 64% leh anăn ênŭm 2 aruăt mâo 9.41%. čiăng gang mkhư̆ klei ruă tưp bluh đĭ, čar Dak Lak čiăng bi hmar bruă tlŏ mgang vaccine. Kyuanăn bruă mkăp brei 5 boh êdeh hiu tlŏ vaccine jing bruă klă klơ̆ng, đru kơ čar Dak Lak ngă hmar bruă tlŏ mgang ti krĭng taih kbưi, dŭm alŭ wăl kƀưi hŏng anôk bruă mdrao mgŭn.

Y Ƀel pô mblang