VOV4.Êđê - Khădah Anôk bruă sang čư̆ êa čar Dak Lak bi mklă bi kdung wưng nao hriăm hră truh kơ hruê 15/9, ƀiădah ară anei Dak Lak ăt tuôm hŏng lu klei dleh dlan hlăm bruă mkăp hdruôm hră hriăm kơ phung hđeh. Mta phŭn jing kyua hră m’ar amâo djŏ jing mnơ̆ng yua čiăng mjêč kyua anăn mơ̆ng hruê 26/8 truh kơ ară anei, dŭm anôk čhĭ hdruôm hră ti alŭ wăl dôk ba yua asăp mtrŭn mrô 16 kđăl jih ƀăng, knŏng čhĭ hluê hdră online. Hluê si Trương Văn Băng, Khua anôk bruă mguôp hnư čhĭ hdruôm hră lehanăn mnơ̆ng yua hlăm sang hră Dak Lak, dŭm thŭn êlâo anôk bruă mkăp hdruôm hră dlăng, hră čih, kdrăp mnơ̆ng yua hlăm klei hriăm hră hluê hŏng 7 anôk čhĭ hdruôm hră lehanăn êbeh 400 anôk mkăp hlăm kluôm čar. Thŭn anei kyua klei ruă tưp mâo dleh dưi ksiêm dlăng kyua anăn bruă mkăp, dŭ mdiăng ba hdruôm hră truh hŏng phung hđeh tuôm hŏng lu klei dleh dlan. Mơ̆ng hruê 5/9, anôk bruă hluê ngă leh hdră čhĭ online hluê si klei kuôl kă blei mơ̆ng mnuih blei hră hŏng kdrăp Zalo, Facebook. Kyua jing thŭn tal êlâo pŏk hdră čhĭ hluê êlan online kyua anăn anôk bruă ăt tuôm hŏng lu klei dleh dlan. Klei ruă Covid 19 ti Dak Lak mâo đăo knăl srăng dleh dưi ksiêm dlăng hlăm wưng ti anăp. Kyua anăn, tơdah anôk bruă sang čư̆ êa čar amâo mâo hdră msir djŏ guôp snăn klei hđeh kƀah hdruôm hră hlăm wưng thŭn hriăm mrâo srăng mâo lu./.

H Nêc pô mblang