VOV4.Êđê - Wưng pĕ kphê thŭn anei truh leh, čar Dak Lak čiăng kơ dŭm êtuh êbâo čô ngă bruă pĕ kphê. Ƀiădah hlăm wưng klei ruă tưp Covid-19 dôk dleh dưi ksiêm dlăng, bruă ba phung mă bruă pĕ kphê, rơ̆ng klei êđăp ênang hŏng klei ruă tưp, dôk jing sa klei uêñ mĭn mơ̆ng ƀĭng ngă lŏ hma leh anăn bruă sang čư êa čar Dak Lak. Tui si knơ̆ng bruă lŏ hma leh anăn mđĭ kyar krĭng ƀuôn sang, wưng thŭn 2021-2022, čar Dak Lak mâo êbeh 209 êbâo ha, hnơ̆ng boh mnga mâo hlăm brô 500 êbâo tôn.

Čiăng rơ̆ng kơ bruă hrui pĕ kphê mâo klei jăk, dŭm kdriêk čiăng čŏng mkŏ mjing dŭm hdră êlan iêo mthưr mnuih mă bruă pĕ kphê djŏ hŏng boh sĭt klei ruă tưp hlăm alŭ wăl. Bruă sang čư êa jao kơ knơ̆ng bruă knơ̆ng bruă lŏ hma leh anăn mđĭ kyar krĭng ƀuôn sang gĭt gai, bi mguôp hŏng dŭm knơ̆ng bruă, dhar bruă ngă klei hâo hưn, mkŏ mjing, mtô kơ bruă sang čư êa dŭm kdriêk, wăl krah, ƀuôn prŏng, mkŏ mjing hdră êlan hrui pĕ kphê êđăp ênang, mâo boh tŭ dưn.

Y Ƀel pô mblang