VOV4.Êđê - Khua anôk bruă sang čư̆ êa čar, Khua anôk bruă gĭt gai hdră gang mkhư̆ klei ruă tưp ti mnuih hlăm čar Dak Nông bi mklă leh hdră bi ktlah yang ƀuôn kluôm kdriêk Dak Mil, ba yua kjăp Asăp mtrŭn mrô 16 leh mâo lu mnuih ruă Covid 19 hlăm êpul êya. Wưng hluê ngă hdră bi ktlah yang ƀuôn mphŭn mơ̆ng 10h mmăt hruê 14/9 truh kơ hbĭl mâo klei hưn mthâo mrâo kñăm gang mkhư̆ klei ruă tưp.

Hluê si klei hưn mơ̆ng Anôk gĭt gai kdriêk Dak Mil, hruê 13/9, Anôk bruă mdrao mgŭn kdriêk hmư̆ klei hưn mâo 1 gŏ êsei ti alŭ mrô 2, wăl krah Dak Mil mâo klei bi êdah êngoh hlơr, êmăn hlăm asei mlei. Mă mta ksiêm dlăng RT-PCR, 4 čô hlăm gŏ sang mâo bi mklă djŏ kman SARS-Cov-2. Hluê si boh tŭ ksiêm dlăng, gŏ sang anei čhĭ boh kroh, hlăm brô 10 hruê êlâo, bi tuôm hŏng pô mgăt êdeh mdiăng boh kroh mơ̆ng ƀuôn prŏng Hồ Chí Minh. Leh mâo mnuih ruă hlăm êpul êya, kdriêk Dak Mil kwang dar leh 4 krĭng mâo mnuih ruă mbĭt anăn ba mnuih ruă Covid 19 nao dŏng mdrao ti Anôk bruă mdrao mgŭn kdriêk lehanăn ba 164 čô jing F1 nao bi ktlah mklin sa anôk./.

H Nêč pô mblang