VOV4.Êđê - Hruê 28/10, Êpul gơ̆ng bruă mnuih ƀuôn sang čar Dak Nông tal IV, wưng thŭn 2021 – 2026 mkŏ mjing leh Klei bi kƀĭn thơ̆ng kơ bruă, ksiêm dlăng, bi trông lehanăn bi mklă 7 hdră bruă, hdră mtrŭn yuôm bhăn hŏng hdră mđĭ kyar bruă duh mkra ala ƀuôn mơ̆ng čar.

Ti anôk bi kƀĭn, Êpul gơ̆ng bruă mnuih ƀuôn sang čar Dak Nông ksiêm dlăng, bi trông lehanăn bi mklă 7 hdră bruă, hdră mtrŭn yuôm bhăn, hlăm anăn mâo: Hdră mtrŭn ksiêm dlăng, mkra mlih hdră čuăl mkă 3 mta dliê ti alŭ wăl čar Dak Nông; hdră mtrŭn kčah mtrŭn hdră đru mjuăt bi hriăm bruă ti alŭ wăl čar wưng thŭn 2021 – 2025; Hdră mtrŭn bi mklă dŭm mta thiăm mbŏ hlăm hdră čiăng hrui mă lăn, bi mlih mta kñăm ba yua lăn čiăng mđĭ kyar bruă duh mkra – ala ƀuôn thŭn 2021... Klei năng mđing jing Hdră mtrŭn ksiêm dlăng, mkra mlih hdră čuăl mkă 3 mta dliê ti alŭ wăl čar Dak Nông, hluê anăn mâo giăm 640 ha dưi kbiă mơ̆ng hdră čuăl mkă lăn dliê, hluê ngă hră mkăp djă yua lăn kơ mnuih ƀuôn sang djŏ guôp hŏng klei dôk mâo sĭt./.

H Nêč pô mblang