VOV4.Êđê- Hlăm hruê mphŭn pŏk thŭn hriăm mrâo 5-9 mrâo êgao, anôk bruă djŏ tuôm čar Dak Nông ƀuh 1 čô hđeh sang hră mâo klei ruă Covid-19. Knơ̆ng bruă sang hră mtô bi hriăm alŭ wăl mdei êjai bruă mkŏ mjing bi hriăm ti sang hră. Hjăn hŏng dŭm Sang hră Knŭk kna rông ba brei phung hđeh dôk ti sang hră leh anăn kriê dlăng bi tliêr kjăp hđeh sang hră. Ti kdriêk Dak Rlâp, hlăm wưng êgao, bruă sang čư̆ êa leh anăn bruă djŏ tuôm mâo leh lu bruă đru, mđĭ ai phung hđeh leh anăn nai mtô hlăm krĭng mâo klei ruă tưp.

Leh hmao ƀuh sa čô hđeh djŏ kman Sar CoV2 hlăm hruê 5/9, êbeh 220 čô hđeh lehanăn nai mtô ti Sang hră čiêm rông hđeh mnuih djuê ƀiă kdriêk Dak Rlâp, čar Dak Nông hluê ngă leh hdră bi ktlah ti Sang hră kñăm gang mkhư̆ klei ruă Covid 19. Nguyễn Văn Nam, Khua sang hră čiêm rông hđeh mnuih djuê ƀiă gưl dua lehanăn gưl tlâo kdriêk Dak Rlâp, čar Dak Nông brei thâo, grăp hruê sang hră bi hgŭm hŏng êpul mdrao mgŭn nao ksiêm dlăng hnơ̆ng hlơr asei mlei lehanăn hưn mthâo pral klei suaih pral phung hđeh lehanăn phung nai:

“Kơ knuă druh, mnuih mă bruă, anôk dôk, anôk huă ƀơ̆ng sang hră mkŏ dăp leh adŭ mă bruă lehanăn adŭ hriăm mkăn kơ phung nai. Hŏng phung hđeh ăt mâo anôk dôk jăk mơh, mâo truh 27 boh adŭ mâo pui kmlă, êa yua djăp ênŭm, sang tlô mdê mdê mơh. Bi kơ klei ƀơ̆ng huă phung hđeh ăt duh jăk msĕ si wưng ka mâo klei ruă tưp. Hluê hŏng nai kiă adŭ, sang hră ăt mtô mblang čiăng kơ phung amĭ ama h’ĭt mơh ai tiê. Hlăm anei, sang hră mđing dlăng nanao mơ̆ng klei huă ƀơ̆ng, bi mdoh wăl hdĭp mda, mdjiê kman, ksiêm dlăng klei suaih pral, tơdah amâo jăk asei sang hră srăng bi hgŭm hŏng anôk bruă mdrao mgŭn ksiêm dlăng kơ phung hđeh”.

Dŭm anôk bruă sang hră ti Dak Nông mdei êjai klei mtô bi hriăm ti sang hră

Leh hmao ƀuh sa čô hđeh djŏ klei ruă Covid 19, čar Dak Nông mdei êjai hdră mtô bi hriăm klă anăp ti dŭm anôk bruă. Knơ̆ng bruă Sang hră m’ar mtô bi hriăm čar Dak Nông mtă kơ jih gưl hriăm: Gưl sa, dua, tlâo, mtô mjuăt nanao lehanăn anôk mtô bi hriăm mkăn ti alŭ wăl čar mdei êjai hdră mtô bi hriăm klă anăp kơ phung hđeh dơ̆ng mơ̆ng hruê 7/9 truh kơ hbĭl mâo klei hưn mthâo mrâo. Hŏng Sang hră čiêm rông hđeh mnuih djuê ƀiă dŭm kdriêk lehanăn Sang hră gưl tlâo čiêm rông hđeh mnuih djuê ƀiă N’Trang Lơng, mkŏ mjing hdră brei phung hđeh hlŏng dôk ti sang hră lehanăn kriê dlăng kjăp phung hđeh. Hŏng Sang hră gưl tlâo Chuyên Nguyễn Chí Thanh brei phung hđeh lŏ wĭt ti alŭ wăl lehanăn mtă kơ phung hđeh hluê ngă kjăp hdră gang mkhư̆ klei ruă tưp hluê si klei kčah mtrŭn.

Knơ̆ng bruă Sang hră m’ar mtô bi hriăm Dak Nông mtă kơ dŭm anôk bruă mtô bi hriăm hluê ngă kjăp hdră gang mkhư̆ klei ruă tưp. Dŭm sang hră hluê hŏng klei dôk mâo, pŏk ngă kjăp dŭm hdră mtô bi hriăm hluê online, jao klei hriăm wĭt ngă ti sang kơ phung hđeh hluê êlan mạng yang ƀuôn kñăm đru kơ phung hđeh lŏ tui ksiêm klei hriăm. Anôk bruă sang hră m’ar pral bi hgŭm hŏng anôk bruă mdrao mgŭn ktrâo lač kơ phung hđeh, nai mtô ngă jăk hdră gang mkhư̆ klei ruă, rơ̆ng kjăp klei suaih pral kơ jih jang phung hđeh lehanăn nai mtô hgao wưng dôk bluh mâo klei ruă tal anei. Boh nik, hŏng phung hđeh jing F0, mâo mđing dlăng lu hĭn, mtrŭt mjhar phung hđeh h’ĭt ai tiê hluê ngă jăk hdră gang mkhư̆ klei ruă tưp. Nguyễn Văn Toàn, Khua knơ̆ng bruă sang hră m’ar mtô bi hriăm čar Dak Nông čang hmăng phung nai lehanăn phung hđeh krơ̆ng kjăp klei suaih pral, hluê ngă kjăp klei kčah mtrŭn gang mkhư̆ klei ruă čiăng hnưm lŏ wĭt mtô lehanăn hriăm.

“Ară anei Knơ̆ng bruă sang hră m’ar iêu đĭng blŭ čuă êmuh, mtrŭt mđĭ ai phung nai lehanăn phung hđeh h’ĭt ai tiê dôk ti sang hră kyua klei suaih pral mơ̆ng pô lehanăn phung hđeh. Phung nai mtô kiă adŭ brei ksiêm dlăng nanao, thâo jih mrô đĭng blŭ gŏ sang hđeh čiăng hưn mthâo klei suaih pral phung hđeh dôk ti sang hră mbĭt anăn mtrŭt mđĭ ai gŏ sang hđeh čiăng kơ hđeh h’ĭt ai tiê dôk ti sang hră. Knơ̆ng bruă ăt gĭt gai phung khua sang hră ksiêm dlăng kjăp, đăm lui bluh mâo klei bi mtưp hlăm sang hră”.

Hlăm lam Sang hră mnuih djuê ƀiă knŭk kna rông ba kdriêk Dak Rlâp

Leh hmao ƀuh anôk djŏ kman Sar CoV2 hlăm êpul êya mơ̆ng sa čô hđeh hriăm hră ti să Quảng Tín, kdriêk Dak Rlâp, K’iăng khua anôk bruă sang čư̆ êa čar Dak Nông Tôn Thị Ngọc Hạnh bi mklă ba yua leh dŭm hdră msir mjêč hlăm hdră gang mkhư̆ klei ruă Covid 19 ti alŭ wăl. Hluê anăn, čar Dak Nông bi mklă kwang dar kluôm kdriêk Dak Rlâp mơ̆ng 12h hruê 7/9 lehanăn ba yua kjăp Asăp mtrŭn mrô 16. Võ Thị Kiều Linh, K’iăng khua anôk bruă sang čư̆ êa kdriêk Dak Rlâp lač, leh čar ba yua asăp mtrŭn mrô 16, kdriêk mâo leh hdră mkăp mnơ̆ng ƀơ̆ng huă kơ mnuih ƀuôn sang hluê hŏng êpul Covid 19 yang ƀuôn. Mnuih hgŭm hlăm êpul anei srăng nao mbha mnơ̆ng ƀơ̆ng huă truh kơ grăp gŏ sang, êpul êya bi ktlah, hlăm anăn mâo êbeh 220 čô nai, phung hđeh čiăng kơ grăp čô h’ĭt ai tiê, ti anôk dôk hlŏng dôk tinăn yơh.

“Hmei mtă kơ Anôk gĭt gai hdră gang mkhư̆ klei ruă tưp mơ̆ng să ăt msĕ mơh mơ̆ng kdriêk brei rơ̆ng kjăp mnuih ƀuôn sang amâo ư̆ êpa, kƀah mnơ̆ng ƀơ̆ng huă hlăm wưng mâo klei ruă. Hmei mă leh mnơ̆ng mơ̆ng phŭn mkăp, tơdah mnuih ƀuôn sang kƀah tal êlâo hĭn srăng đru braih lehanăn ƀung hdang krô. Lehanăn ăt ksiêm dlăng gŏ êsei ƀun, giăm ƀun, gŏ sang knŭk kna dlăng ba čiăng mâo hdră đru kơ mnuih ƀuôn sang amâo ư̆ êpa, kƀah mnơ̆ng”.

Êpul hgŭm bruă mniê kdriêk Dak Rlâp pŏk ngă leh gru hmô “Shiper amâo mă prăk” đru kơ mnuih ƀuôn sang nao sang mnia, čiăng kơ mnuih ƀuôn sang h’ĭt ai tiê dôk ti sang gang mkhư̆ klei ruă. Êpul mkŏ mjing leh 110 êpul nao sang mnia mâo giăm 700 čô mnuih hgŭm mơ̆ng dŭm alŭ, ƀuôn. Grăp hruê, êpul “Shiper amâo mă prăk” srăng nao đru nao sang mnia blei mnơ̆ng kơ mnuih ƀuôn sang. Tơdah nao jao mnơ̆ng, êpul anei amâo bi tuôm klă anăp ôh ƀiădah dưm ti ƀăng jang sang kñăm hluê ngă kjăp klei kčah mtrŭn gang mkhư̆ klei ruă tưp. Gru hmô anei srăng mâo Êpul hgŭm bruă mniê kdriêk Dak Rlâp krơ̆ng ngă kjăp hlăm wưng bi ktlah yang ƀuôn hluê si Asăp mtrŭn mrô 16./.

Pô mblang: H’Nêč Êñuôl