VOV4.Êđê- Čar Dak Nông bi êdu leh hdră bi ktlah yang ƀuôn ti dŭm alŭ wăl lŏ hluê ngă Asăp mtrŭn mrô 19, lŏ pŏk ƀăng hdră mnia mblei ti alŭ wăl. Hluê si hră m’ar mâo Anôk bruă sang čư̆ êa čar Dak Nông ba mdah hruê 23/9, ƀuôn prŏng Gia Nghĩa lehanăn 5 kdriêk mâo: Tuy Đức, Dak Glŏng, Dak Song, Krông Knô, Čư̆ Jut, bi mlih mơ̆ng Asăp mtrŭn mrô 15 jing Asăp mtrŭn mrô 19. Knŏng ti kdriêk Dak Rlâp ăt hluê ngă Asăp mtrŭn mrô 15 lehanăn kdriêk Dak Mil ăt hluê ngă Asăp mtrŭn mrô 16. Dŭm alŭ wăl hluê ngă Asăp mtrŭn mrô 19, Anôk bruă sang čư̆ êa čar Dak Nông brei pŏk ƀăng sang tuê jưh pprŏng, anôk čhĭ mnơ̆ng lehanăn dưi mkŏ wĭt êlan dŭ mdiăng tuê mlir čar. Klei mgrơ̆ng hŏng dŭm anôk ngă bruă anei jing hluê ngă kjăp klei kčah mtrŭn gang mkhư̆ klei Covid 19 hluê si klei kčah mtrŭn mơ̆ng Phŭn bruă mdrao mgŭn. Klă klơ̆ng, amâo dưi dôk bi nghi êgao 30 čô mnuih êngao kơ anôk bruă, sang êa drao gŭn, sang hră. Tĭng truh hruê 23/9, čar Dak Nông mâo 697 čô djŏ Covid 19, hlăm anăn mâo 253 čô hlao dưi kbiă mơ̆ng sang êa drao./.

Pô mblang: H’Nêč Êñuôl