VOV4.Êđê - Ti čar Dak Lak ară anei mâo giăm 4 êbâo čô mniê mă bruă mdrao mgŭn, phung nai aê mdrao. Hlăm hdră mdrơ̆ng hŏng Covid 19, tlă anăp hŏng lu klei huĭ hyưt, mơ̆ng phung mă bruă ksiêm dlăng mnuih ruă hlăm êpul êya yang ƀuôn amâo dah hlăm adŭ mkă dlăng kman amâo dah mnuih kriê dlăng, dŏng mdrao kơ mnuih ruă Covid 19... diñu gĭr hŏng jih ai tiê lehanăn ba myơr leh klei suaih pral, klei thâo, lui hĕ êjai klei mĭn čiăng mơ̆ng pô kñăm h’ĭt ai tiê nao hlăm hdră gang mkhư̆ klei ruă.

Leh wĭt êdei kơ sa mlan nao đru bruă mdrơ̆ng hŏng klei ruă tưp Covid 19 ti ƀuôn prŏng Hồ Chí Minh. Aê mdrao Trần Thị Lệ, Hlăm anôk bruă mdrao mgŭn klei ruă bŏk brŭ, sang êa drao prŏng krĭng Lăn Dap kngư ăt adôk ka jih mơh klei dôk ktrŏ hlăm ai tiê klei mĭn pô. Anôk ñu mă bruă jing alŭ wăl mdrao mgŭn mnuih ruă Covid 19 ti sang êa dao krĭng hlơr, sang êa drao Chợ Rẫy. Klei mjhĭt m’uăt, mjêč mêč mơ̆ng phung nai aê mdrao, kñăm čiăng mâo dŏng đru kơ klei hdĭp mnuih ruă, dŭm klei bi êwa dleh hmư̆ mđrĭng hŏng ênai masin tit tit mơ̆ng Ecmo...ñu yăl dliê:"Klei msĕ snăn lu êdi hlăm grăp hrue, grăp čô mnuih ruă djiê, êjai hmei dôk gĭr čiăng dŏng hdĭp digơ̆, leh găn klei djuê anăn jih jang hmei msĕ sơăi ai tiê, bŏ hŏng klei gĭr êdi, amâo mâo dưi dlưh ai tiê ôh, bi jih hnơ̆ng yơh mdrao hŏng klei tŭ dưn. Êngao kơ bruă mdrao mgŭn hmei lŏ đru kčĕ kơ mnuih ruă, blŭ hrăm jĕ giăm hŏng digơ̆, pătdah mmông anăn amâo lŏ mâo klei bi kbưi ôh. Lu blư̆ ƀuh phung hlăm sang digơ̆ dôk kbưi knŏng iêo hŏng đĭng blŭ, lehanăn hmư̆ klei phung aê mdrao hưn anăn jing klei djiê hdĭp, amâodah truh kơ kjham leh, aê mdrao djă đĭng blŭ ăt kăn lŏ thâo truh blŭ rei, ƀiădah si thâo lŏ mngă klei sĭt jing msĕ snăn yơh”.

Hŏng amai Trần Thị Thu Thuỷ, mnuih ngă bruă anôk mkă dlăng kman hlăm anôk bruă mdrao mgŭn ƀuôn prŏng Ƀuôn Ama Thuôt yăl dliê mơ̆ng mlan 5/2021 truh kơ ară anei, jing dŭm hrue bŏ hŏng klei dleh dlan hĭn hlăm bruă knuă. Klei hdĭp gŏ sang, lehanăn hlăm jih wưng leh êgao mơ̆ng bruă knuă ngă bi mlih jih klei hdĭp pô bi tui tiŏ klei ruă tưp covid 19 sơăi. Ƀuôn prŏng lŏ ƀuh nanao dŭm anôk mâo klei ruă tưp hlăm yang ƀuôn, lehanăn ngă bruă mkă dlăng kman kơ jih jang mnuih, phung nai aê drao krŏng jih mlam čiăng mkă dlăng kman, lehanăn tui duah mnuih djŏ tuôm:“Hmei mă bruă hŏng klei ktrŏ êdi, amâo lŏ mâo mmông mdei ôh. Leh hmư̆ phung khua kiă kriê iêo snăn hmei nao mtam, bi bruă hlăm gŏ sang snăn hmei lŏ dăp mă hjăn”.

Mrâo kleh kdrăp čŭt hơô mgang asei mlei pô, lehanăn čhiăm guôm ƀô̆ leh 7h amâo mâo mdei mtam dôk hlăm labo mkă dlăng kman Sar CoV 2, amai Trần Thị Nguyên Hằng pô ngă bruă mkă dlăng kman, hlăm anôk bruă kiă kriê klei ruă čar Daklak lŏ ruăt čŭt hơô kdrăp răng mgang asei mlei, kyuadah lŏ mâo sa ênoh mta ba mkă dlăng kman mjêč:“Hŏng bruă pô mă jing amâo mâo lŏ čih yap hrue lehanăn mlam ôh, nanao msĕ snăn yơh sĭt nik srăng hmăi amâo mâo jăk ôh kơ klei suaih pral pô, ƀiădah ƀuh klei bi pŭ anak mơ̆ng kbưi hriê suăi êmăn snăn, êlan kbưi angĭn hjan đĭ hlăm dŭm boh êdeh hơăi mang, snăn mkă klei pô dôk găn ăt jing điêt dhiêt đuič. Pô bi mĭn yơh klei pô săn asei mlei bi đru anei čiăng ba klei êđăp ênang kơ jih jang mnuih, snăn gĭr yơh mă bruă hŏng jih ai tiê”.

Nay Phi La, Khua kiă kriê knơ̆ng bruă mdrao mgŭn čar Daklak brei thâo, ară anei êpul phung nai aê mdrao hlăm čar mâo êbeh 6 êbâo čô mnuih, hlăm anăn mâo truh êbeh 60% jing mniê. Hlăm bruă gang mkhư̆ klei ruă tưp Covid 19, phung mniê ngă bruă mdrao mgŭn, amâo mâo djŏ knŏng thâo hlăm bruă pô, kreh kruiñ, thâo mdjĕ hlăm bruă knuă, ƀiădah lŏ thâo dưn yua wăt knuih kniêng êdu êun mơ̆ng pô êjai mă bruă. Kyua mâo diñu, phung ngă bruă mkă dlăng kman, mnuih ruă mâo dlăng kriê, mdrao mgŭn ƀuh hơĭt ai tiê, msĕ si jĕ giăm hĭn. Hlăm dŭm hrue mlan dôk mdrơ̆ng hŏng klei ruă tưp Covid 19 hŏng phung êkei jing suăi leh, ƀai hĭn lah hŏng phung mniê klei suăi anăn jing prŏng hĭn:“Êjai phung amai adei mniê nao hlăm bruă mdrơ̆ng hŏng klei ruă tưp, ƀiă lu ăt hmăi amâo mâo jăk mơh kơ klei hdĭp mda. Pătdah lui jih bruă dlăng kriê anak aneh, gŏ sang pô bi duh mĭn kơ bruă gang mkhư̆ klei ruă tưp sơăi, anei yơh klei năng čih pioh êdi mơ̆ng dhar bruă mdrao mgŭn hŏng phung amai adei. Hlăm wưng kơ anăp, dhar bruă mdrao mgŭn mâo leh hră iêo mthưr djăp êpul bruă, mnuih mâo klei bi đru kơ phung amai adei hlăm wưng kơ anăp. Kyuadah anei jing phung amai adei dôk săn asei mlei lu hĭn hlăm gưl mâo klei ruă tưp tal anei”.

Hlăm bruă mdrơ̆ng hŏng klei ruă tưp Covid 19 adôk ka dưi thâo tĭng mkă ôh, adôk sui thŭn mlan, phung nai aê mdrao mniê ăt hlăk dôk hrue lehanăn mlam gĭt ktĭr, păn kjăp ai tiê hlăm anôk tal êlâo hrăm mbĭt hŏng jih jang djăp êpul êya kñăm msưh kdŭn klei ruă tưp pioh ba wĭt klei hdĭp mda msĕ si aguah tlam kơ jih jang mnuih./.