VOV4.Êđê- Hlăk êjai anăn, ti kdriêk Čư̆ Mgar, čar Dak Lak, mnuih rông mnơ̆ng dôk tlă anăp hŏng lu klei dleh dlan kyua klei ruă tưp ti mnơ̆ng rông dôk mâo dleh dưi ksiêm dlăng.

Dŭm drei êmô mâo klei ruă bi bŏk ti gŭ klĭt djiê păt čiăng jih, aduôn Hoàng Thị Chấn, tĭ alŭ 8 wăl krah Quảng Phú, kdriêk Cư̆ Mgar, čar Dak Lak mâo dưi mdăp ôh klei ênguôt leh kyua dŭm ngăn prăk hlăm gŏ sang pô luič hơăi mang. Aduôn Hoàng Thị Chấn brei thâo, hlăm sang mâo 4 drei êmô, djiê leh 3 drei, luič măng truh kơ giăm 100 êklăk prăk.

“Iêo leh mơh arăng hriê tlŏ mgang, krih êa drao jih leh mơh. Ƀiădah klei ruă tưp hriê pral đei, êlâo anăn êmô ana djiê, tlâo hruê êdei êđai ñu hlŏng djiê mơh. Ară anei truh kơ sa drei anei giăm 2 mlan lŏ mâo klei ruă leh anăn djiê mơh.”

Knuă druh mdrao kơ mnơ̆ng rông tlŏ kơ êmô

Mbĭt hŏng klei ruă bi bŏk ti gŭ klĭt hlăm êmô kbao, ti kdriêk Čư̆ Mgar, klei ruă ô̆ eh hlăm ŭn ăt bluh đĭ ktang. Nguyễn Ngọc Đương, ti alŭ Hiệp Hoà, să Quảng Hiệp, kdriêk Čư̆ Mgar brei thâo, 3 drei ŭn ana leh anăn ŭn pioh čhĭ mă kđeh mơ̆ng sang ñu dưi ba čhĭ leh, ƀiădah djŏ klei ruă, kyuanăn ba čuh rai jih.

“Kâo tlŏ ênŭm leh mơh vaccine 3 hlăm 1, klei ruă, tian, kđuič mtah gŭ knga, kblăi ƀgei, kplôc kčuôp. Hmei rông bi tlah kbưi ƀiădah kăn thâo bĭt leh phŭn mtưp. Hruê tal êlâo ƀuh sa drei klĭt hrah hrah, truh kơ hruê tal 2, jih jang diñu dôk đih sơăi, mơ̆ng ŭn ana truh kơ ŭn pioh čhĭ mă kđeh. Kâo nao hưn leh hŏng anôk bruă rông mnơ̆ng hlăm să, bruă sang čư̆ êa leh anăn diñu hriê mă mta ksiêm mkă ƀuh mâo klei ruă tian ô̆ eh hlăm ŭn.”

 Čuh dơr mnơ̆ng rông mâo klei ruă

Tui si klei yap mơ̆ng adŭ bruă lŏ hma leh anăn mđĭ kyar krĭng ƀuôn sang kdriêk Čư̆ Mgar, truh kơ ară anei, klei ruă bi bŏk ti gŭ klĭt mâo leh hlăm 42 alŭ buôn hlăm 14 să, wăl krah. Êpul êya ngă bruă čuh rai leh 88 drei êmô kbao hŏng boh ktrŏ giăm 8.500 kg. Bi kơ klei ruă tian ô̆ eh hlăm ŭn bluh đĭ lar truh kơ 9 să, wăl krah hŏng boh ktrŏ ŭn ba čuh bi rai giăm 26.000 kg.

    Nguyễn Quang Đức, khua kiă kriê anôk bruă mdrao mgŭn kơ mnơ̆ng rông Kdriêk Čư̆ Mgar brei thâo, ară anei, anôk bruă dôk ngă klei tlŏ mgang vaccine kơ mnơ̆ng rông, mbĭt anăn lŏ bi mguôp hŏng bruă sang čư̆ êa alŭ wăl mđĭ ngă bruă ksiêm dlăng klei čuh mdjiê, dŭ mdiăng, čhĭ mnia ŭn êmô hlăm alŭ wăl.

“Leh mâo klei ruă tưp, adŭ bruă lŏ hma leh anăn mđĭ kyar krĭng ƀuôn sang ngă leh dŭm hdră mjêč msĕ si, krih êa drao mdjê kman, tlŏ mgang vaccine hŏng klei ruă bi bŏk tu agŭ klĭt. Truh kơ ară anei, klei ruă tưp dưi ksiêm dlăng leh. Sĭt hmư̆ klei hưn mthâo, anôk bruă srăng tiŏ nao mnuih ngă bruă ksiêm dlăng, mgaih msir anôk mâo klei ruă ti năn, mă mta ksiêm mkă kman leh anăn mơĭt kơ gưl bruă kơ dlông ngă klei ksiêm mkă. Êjai dôk guôn boh tŭ dưn. Mnơ̆ng rông djiê srăng ba čuh bi rai. Tơdah ƀuh mâo klei ruă tưp hlăm klei ksiêm mkă, êpul ngă bruă srăng yua dŭm hdră êlan mgaih msir ti anôk anăn mtam leh anăn hâo hưn kơ alŭ wăl.”

Pô mblang: Y-Ƀel Êban