VOV4.Êđê - Dŭm êpul êya bruă pui kmlă čar Daklak bi leh ênŭm bruă mkra wĭt êlan klei pui kmlă, lŏ wĭt mkăp pui kmlă kơ 16 êbâo 500 gŏ êsei jhat êlan klei pui kmlă kyua angĭn hjan ti dŭm kdriêk Êa Kar, Mdrak, Êa Hleo.

Êlâo anăn, kyua hmăi amâo mâo jăk mơ̆ng angĭn êbŭ mrô 5, mâo hjan prŏng lehanăn angĭn ktang ngă êbuh kyâo mtao lehanăn gơ̆ng pui, jhat anôk mđĭ mtrŭn pui ti dŭm alŭ wăl. Msĕ si, krĭng bi knông Êa Kar hŏng Mdrak, mâo hjan prŏng kluh lăn, ana kyâo êbuh jăm hlăm êlan klei pui kmlă kdrêč 471F18, ngă luič pui kmlă kơ 11 êbâo 600 anôk yua pui hlăm dua boh kdriêk anei.

Ti dŭm anôk mâo klei truh boh nik hlăm čŏng čư̆ dlông, jing dleh dlăn măng ai hlăm bruă lŏ mkra wĭt. Siămdah, Êpul bruă pui kmlă pral tiŏ nao leh lu mnuih ngă bruă, bi leh êlan klei pui kmlă jhat akŏ hrue kăm anei. msĕ snăn, ti dŭm alŭ wăl mơ̆ng êpul êya bruă pui kmlă Êa Hleo kiă kriê, angĭn đrŭng ngă êbuh sa ƀĕ gơ̆ng pui lehanăn jhat sa anôk mđĭ mtrŭn pui hmăi amâo mâo pui kmlă truh 5 êbâo anôk yua pui. Bruă lŏ kơrŭ wĭt pui kmlă pral mâo hlŏng ngă hlăm hrue mtam. Ti đa đa alŭ wăl, dŭm êpul êya pui kmlă Daklak ăt pral tiŏ nao mnuih mghaih msir djăp mta bruă jhat mơ̆ng hjan angĭn ngă, boh nik ti dŭm alŭ wăl dôk hlăm klei kwang dar gang mkhư̆ klei ruă tưp covid 19./.

Y Khem pô mblang