VOV4.Êđê -  Hrue mbrue (22/10), bruă Đảng čar Daknông mkŏ mjing leh klei bi kƀĭn ksiêm wĭt 5 thŭn hlue nga hdră mtrŭn Gưl dlông 4, gưl 12, 3 thŭn hlue nga hdra êlan mrô 05 mơ̆ng Bruă Đảng čar mtrŭn kơ klei mkŏ mjing, ƀư̆ mkra hlăm Đảng, gang mkhư̆, msưh kdưn klei toh hroh klei mĭn, knhuah bruă kđĭ čar, klei dôk dơ̆ng ƀơ̆ng huă amâo mâo jăk hlăm phung khua kiă kriê mơ̆ng Đảng. klei bi kƀĭn hŏng online mkŏ hlăm 8 anôk jing dŭm kdriêk, ƀuôn prŏng hlăm čar.

Hlue ngă hdră mtrŭn Gưl dlông 4, gưl 12, bruă Đảng čar Daknông mtrŭn leh hdra êlan 05, mjing hdră mă bruă bi djŏ kơ dŭm alŭ wăl, dŭm gưl bruă Đảng ngă bi djŏ hŏng klei kčĕ, pral mâo ksiêm wĭt, lehanăn hlue gưt bi ênŭm jih jang bruă yap jing bruă jăk mnuih jăk, bruă kuč mngač kơ ƀuôn sang, bruă mđĭ mlih hdră ngă hră mơar kơ phung ƀuôn sang, bruă mkŏ mjing klei kkuh hla čhiăn gru lehanăn mjuăt bi hriăm knhuah klei mĭn hlăm grăp mlan... Hlăm wưng kơ anăp, Êpul khua kiă kriê bruă Đảng čar Daknông mtă leh kơ dŭm gưl bruă Đảng, mkŏ mjing hdră, mâo dŭm hdră klă mngač hĭn, mđing kơ bruă ksiêm dlăng, ksiêm wĭt, čŏng ksiêm wĭt, hlue ngă bruă klam mghaih msir klei awăt kƀah mơ̆ng dŭm êpul êya lehanăn mnuih./.

Y Khem pô mblang