VOV4.Êđê- Lŏ dơ̆ng hdră bi kƀĭn tal 4, hruê 13/10, Dhar bruă gĭt gai anôk bruă kƀĭn ala brei leh klei blŭ kơ bruă mprăp kơ Klei bi kƀĭn tal 2, anôk bruă kƀĭn ala gưl 15; Brei klei blŭ kơ Klei čih mkra Hdră bhiăn mlih mrâo, thiăm mbŏ dŭm Mta hlăm bruă ksiêm yap ala čar mơ̆ng Hdră bhiăn ksiêm yap; Ksiêm dlăng, bi mklă bruă lŏ thiăm klei đăo tĭng hlăm bruă hrui, bi liê prăk đru mơ̆ng ala tač êngao thŭn 2021 kơ čar Quảng Nam. Klei năng mđing, Dhar bruă gĭt gai anôk bruă kƀĭn ala brei leh klei blŭ kơ bruă čuăl mkă ba yua lăn ala čar wưng thŭn 2021 – 2030, hnơ̆ng trah dlăng truh ti thŭn 2050 lehanăn hdră kčah ba yua lăn 5 thŭn 2021-2025. Hluê si klei dưi, anôk bruă kƀĭn ala jing anôk bruă bi mklă hdră čuăl mkă ba yua lăn wưng thŭn 2021 - 2030, hnơ̆ng trah dlăng truh ti thŭn 2050. Hdră čuăl mkă ba yua lăn ala čar jing hdră čuăl mkă phŭn, kluôm dhuôm, nao êlâo hlăm djăp bruă, mjing tur knơ̆ng kơ hdră čuăl mkă kluôm anôk bruă, čuăl mkă grăp krĭng. Hdră čuăl mkă ba yua lăn ala čar kñăm răng mgang, krơ̆ng kjăp lăn pla mdiê djŏ guôp kñăm rơ̆ng mâo djăp mnơ̆ng ƀơ̆ng huă ala čar, dliê răng mgang akŏ êa, dliê čŏng mâo kñăm răng mgang wăl hdĭp mda, mdrơ̆ng hŏng klei bi mlih yan adiê./.

                                                    Pô mblang: H’Nêč Êñuôl