VOV4.Êđê - Lŏ dơ̆ng hdră Klei bi kƀĭn tal 03 mơ̆ng Dhar bruă gĭt gai Bruă kƀĭn ala, hruê 20-9, ti gŭ klei gĭt gai mơ̆ng Khua bruă kƀĭn ala Vương Đình Huệ, Dhar bruă kƀĭn ala brei klei blŭ mguôp kơ dŭm klei hưn mdah bruă knuă thŭn 2021 mơ̆ng Êpul hgŭm čih mkra hdră bhiăn. Bi trông hlăm klei bi kƀĭn, Dhar bruă gĭt gai Bruă kƀĭn ala lač, dŭm klei hưn mdah mơ̆ng Knŭk kna, Sang phat kđi gưl dlông, Sang msir kđi gưl dlông dưi mprăp jih klei dưi leh anăn mâo lu klei mlih mrâo. Khădah, mtă kơ dŭm anôk bruă brei ngă bi klă dŭm hdră msir čiăng mđĭ lar dŭm klei jăk hlăm hdră gang mkhư̆ klei ngă soh hdră bhiăn, gang mkhư̆ klei ƀơ̆ng ngăn, msir mgaih klei êdu kƀah, bi klă klei mâo dŭm klei ngă soh hdră bhiăn mrâo čiăng mâo hdră msir mgaih, brei lŏ dơ̆ng bi leh klei bhiăn, mlih mrâo bruă gĭt gai, mđĭ ktang klei bi hgŭm, hlăm anăn mđing kơ bruă mkra mlih, mbŏ, bi leh dŭm klei bhiăn, hdră êlan, dŭm klei akâo klă klơ̆ng hŏng Bruă kƀĭn ala, Dhar bruă gĭt gai Bruă kƀĭn ala.

H Zawut pô mblang