VOV4.Êđê- Tlam mmbruê, Khua bruă kƀĭn ala Vương Đình Huệ gĭt gai leh klei kƀĭn mjêč mơ̆ng dhar bruă gĭt gai bruă kƀĭn ala čiăng brei boh blŭ kơ bruă ba mdah hdră êlan đru kơ mnuih mă bruă leh anăn pô yua mnuih mă bruă mâo klei hmăi kyua klei ruă tưp Covid-19 mơ̆ng ngăn prăk ênua luič bruă mă. Blŭ hlăm klei kƀĭn anăn, khua bruă kƀĭn ala Vương Đình Huệ brei thâo, hruê mmông êgao, Dhar bruă gĭt gai bruă kƀĭn ala leh anăn knŭk kna mâo leh lu hdră êlan, kñăm đru kơ mnuih ƀuôn sang, knơ̆ng bruă găn klei dleh dlan kyua klei ruă tưp Covid-19. Khădah, ti anăp klei dleh dưi ksiêm dlăng mơ̆ng klei ruă tưp. Knŭk kna mtă brei yua 30.000 êklai prăk mơ̆ng keh prăk ênua luič bruă mă thŭn 2020 čiăng đru kơ mnuih mă bruă sa blư̆ hŏng prăk, pô yua mnuih mă bruă dưi bi hrŏ mơ̆ng 1% trŭn jing 0% keh prăk mlan kơ mnuih mă bruă jing phung nao hgŭm hlăm ênua luič bruă mă hŏng hnơ̆ng hlăm brô 8.000 êklai prăk. jih 2 hdră anei dưi bi klă hlăm klei bhiăn bruă mă thŭn 2013, kyuanăn bruă bi mlih hdră êlan anei hlăm klei dưi mơ̆ng bruă kƀĭn ala.

Pô mblang: Y-Ƀel Êban