Drei dôk hmư̆ asăp mmuñ mơ̆ng pô thâo mbruă Y- Nguk Niê kreh iêo Aê Suang hŏng klei mmuñ Eirei. Klei mmuñ bi mni kơ ƀuôn sang jăk siam, ngă kơ phung hmư̆ mâo thiăm klei mơak, khăp kơ klei hdĭp, mtă mtăn kơ mnuih ƀuôn sang thâo khăp, răng mgang kyâo dliê, akŏ pin êa hlăm ƀuôn.

Êngao kơ dŭm klei mmuñ ênhiăng bi mni kơ ƀuôn sang, lăn čar, pô thâo mbruă Aê Suang lŏ thâo lu klei mmuñ ênhiăng msĕ si mmuñ bi kmlah kơ klei khăp êkei mniê, mtă mtăn kơ anak čô kreh kriăng hrăm hră mơar čiăng kơ êdei anei mkŏ mjing ƀuôn sang mdrŏng siam hĭn.

Pô thâo mbruă Aê Suang amĭ k’kiêng leh anăn đĭ hriê kơ prŏng hlăm sa gŏ sang mâo aduôn aê, amĭ ama jing phung thâo mmuñ klei mmuñ ênhiang. Mơ̆ng hlăk dôk điêt, ênai klei mmuñ ênhiang kđăm kma leh hlăm ai tiê klei mĭn ñu. Grăp hmư̆ nao pưk nao hma hŏng amĭ ama jing dŭm blư̆ hmư̆ ama ayŭ đĭng buôt amâodah đĭng năm mbĭt hŏng dŭm klei mmuñ suô̆t đuĕ hĕ klei êmăn ti krah yang hruê dơ̆ng. Pô thâo mbruă Aê Suang brei thâo, dŭm klei mmuñ ênhiang jing klei mđĭ ai, klei bi juh pô leh anăn anak čô hlăm gŏ sang, kyua klei mmuñ ba kơ pô, kơ gŏ sang pô klei mơak leh anăn klei anăn jing dŭm klei mtă mtăn, bi hriăm anak čô hluê ngă dŭm hdră êlan mơ̆ng Đảng leh anăn knŭk kna.

 “Kâo thâo mmuñ Eirei, thâo tông čing. Grăp blư̆ mmuñ klei mmuñ ênhiang djuê ana Êđê kâo ƀuh mơak sơnăk. Klei mmuñ ênhiang Êđê mâo klei mmuñ Kưt, Eirei. Anăn jing dŭm klei mmuñ bi mni kơ Đảng, knŭk kna, amâo mâo hmư̆ asăp phung mplư bi rai ƀuôn sang, kreh kriăng čoh bruă ngă hma, anak čô nao sang hră mơar.”

Amâodjŏ knŏng thâo mmuñ lu klei mmuñ ênhiang, ñu lŏ thâo ayŭ đĭng năm leh anăn jing sa čô hlăm êpul tông čĭng să Čư̆ Mgar, kdriêk Čư̆ Mgar. Hŏng klei khăp čiăng pô, hmăng hmưi dưi lŏ čuê knhuah jăk siam klei mmuñ ênhiang kơ gưl êdei, pô thâo mbruă Aê Suang mbĭt hŏng phung thâo mbruă hlăm ƀuôn gĭr ktưn nao hgŭm hlăm dŭm adŭ mtô klei mmuñ ênhiang, rang mdah klei tông čĭng hlăm alŭ wăl. Pô thâo mbruă Aê Suang brei thâo:

 “Hmei jing phung thâo mbruă khua thŭn mâo sơăi lu klei mĭn. Lu phung thâo mbruă wĭt leh hŏng aduôn Aê tâo tiết. Hmei jing phung nao êlâo hmăng hmưi srăng lŏ mtô kơ anak čô. Mmuñ Eirei amâodah kưt, tông čing amâodah kdrăp pĕ tông mkăn. Hlăm grăp anôk kdŏ mmuñ mơ̆ng ƀuôn sa amâodah klei djiê brŭ… hmei mâo ƀô̆ mta sơăi”.

Mĭn kơ dhar kreh djuê ana pô ƀrư̆ ƀrư̆ luč ram, hŏng bruă klam jing khua ƀuôn ƀuôn Hŭk êbeh 25 thŭn hŏng anei, pô thâo mbruă Aê Suang mâo nanao klei pluă mbĭt mtô kơ mnuih ƀuôn sang thâo khă kơ knhuah dhar kreh djuê ana pô hlăm dŭm mmông bi kƀĭn ƀuôn. Biădah, čiăng ngă klei anăn mnuih ƀuôn sang srăng hrăm mbĭt, sa ai čiăng kơ ênai čing, klei mmuñ kưt, eirei kwang na nao truh kơ ênuk êdei. Pô thâo mbruă Aê Suang lŏ brei thâo:

 “Ară anei knŭk kna uêñ mĭn brei mnuih ƀuôn sang pô djă pioh čing čhar, klei mmuñ ênhiang klei blŭ, djuê ana pô. Klei anăn brei ƀun knŭk kna uêñ mĭn kơ mnuih ƀuôn sang pô lu êdi. Amâo mâo wơr ôh kmnhuah gru djuê ana mnuih Êđê pô. Drei srăng lŏ mtô kơ anak čô, boh nik mơ̆ng hlăk 7 – 8 thŭn mơ̆ng phung thâo mbruă msĕ hŏng hmei.”

Hgăm, amâo mâo pô thâo leh anăn klei khăp, ai tiê hŏng bruă klam, pô thâo mbruă Aê Suang ti ƀuôn Hŭk B, să Čư̆ Mgar, kdriêk Čư̆ Mgar, čar Dak Lak dôk ƀrư̆ ƀrư̆ đru kơ mnuih ƀuôn sang thâo mpŭ kơ ênhiang klei mmuñ, ênai đĭng buôt, ênai čing kwang… Kyua dŭm klei khăp hŏng dhar kreh djuê ana pô msĕ mơ̆ng pô thâo mbruă Aê Suang dưi đru kriê pioh, bi lar boh tŭ dưn dhar kreh djuê ana ti alŭ wăl./.