Bi hŏng mnuih ƀuôn sang Lăn Dap Kngư, khădah ka tuôm bi tuôm hŏng Awa Hồ, ƀiădah hlăm ai tiê grăp čô rup Awa leh anăn dŭm klei yăl dliê kơ ñu ăt mâo nanao. Ti krĭng phŭn bruă krŭ kdơ̆ng Krông bông, dŭm klei blŭ, bruă ngă mơ̆ng Awa mâo mnuih ƀuôn sang bi klă hlăm klei hdĭp grăo hruê. Ayŏng Y-Phang Ƀuôn Yă, ti ƀuôn Krông, să Ea Trul, kdriêk Krông Bông brei thâo:

          Kâo k’kiêng leh lăn čar mâo klei êđăp ênang, kâo ka tuôm mâo bi tuôm hŏng Awa, ƀiădah hlăm klei hdĭp kâo mpŭ nanao kơ Awa kyua ñu jing khua gĭt gai êdah êdi. Kyua čiăng tui hriăm leh anăn hluê ngă gru mngač Awa, grăp hruê hlăm djăp mta bruă ăt msĕ hŏng klei dôk dơ̆ng ƀơ̆ng huă hŏng mnuih ƀuôn sang, kâo gĭr hriăm mơ̆ng Awa dŭm klei diêt hĭn, đru mđĭ kyar klei hdĭp mda gŏ sang, mkŏ mjing alŭ wăl, đru kơ phung knap mñai hlăm ƀuôn sang.

Mbĭt hŏng mnuih ƀuôn sang grăp čar kwar drông klei bi hdơr hruê êngiê, hlăm dŭm hruê anei, mnuih ƀuôn sang Banar ti djăp ƀuôn êlan jĕ giăm taih kbưi ti čar Gia Lai lŏ hdơr kơ Awa Hô, pô ba leh klei êngiê kơ djuê ana Việt Nam. Khua mduôn Yơu, ƀuôn Ktu, să Kon Gang, kdriêk Đăk Đoa brei thâo:

 “Lač kơ Awa, mơ̆ng hđeh truh kơ mnuih prŏng amâo mâo pô amâo thâo ôh. Ñu jing sa klei mĭn prŏng hlăm sa anak mnuih msĕ pô mkăn, jing sa čô khua gĭt gai ala čar. Wăt tơdah ka tuôm bi tuôm ôh, hlăm ai tiê grăp čô mnuih drei ƀuh mâo Awa Hồ giăm pô, mâo ñu ktuê dlăng hlăm djăp bruă ngă. Leh anăn mơ̆ng amăm mơ̆ng anăn grăp čô ƀuh kriăng hriăm, hlue ngă klei jăk Ñu, hdơr kơ klei Awa mtô kơ klei čoh bruă ngă hma.

Mơ̆ng anăn mjing ai ktang hlăm hdră bi lông ktưn khăp kơ ala čar hŏng bruă klă klơ̆ng msĕ sip la mdiê dua yan, pla kphê mâo lu boh, bi hgŭm sa ai tiê… Leh anăn grăp thŭn hmei ăt mkŏ mjing hdră pla kyâo “Hdơr nanao kơ Awa”.