Ana mtei jing mta ana mưng hŏng drei leh anăn tui hlue si klei mbruă mơ̆ng grăp krĭng kwar ana mtei dưi mkra lu mta mnơ̆ng ƀơ̆ng jăk. Ana mtei bi lŭk hŏng čĭm mnŭ mâo mơ̆ng đưm đă hlăm êpul êya anak Êđê. Anei ăt jing sa mta mnơ̆ng ƀơ̆ng mơ̆ng klei hdĭp jĕ giăm hŏng dliê kmrơ̆ng. Hlue si aduôn aê mtô, mơ̆ng ana, hbei, boh amâodah mmông mtei, mnuih Êđê mâo lu mta mnơ̆ng ƀơ̆ng jăk. Mnuih Êđê mâo dŭm mta mnơ̆ng ƀơ̆ng mơ̆ng mmông mtei mjing mnơ̆ng bi lŭk amâodah tŭk hŏng trŏng phĭ. Mta djam anei amâo dleh ôh, ênưih tŭk. Boh nik mâo djam ana mtei dliê bi lŭk hŏng čĭm mnŭ khăng dleh ƀiă, brei phung tŭk knă bi thâo mbruă hlăm klei bi mbăt, leh anăn si wĕ ngă čiăng dưi mâo êa mil siam leh anăn ƀâo mngưi. Čiăng mâo sa mta ana mtei juê bi lŭk jăk, anak Êđê khăng mă ana mtei juê giăm êa, leh koh srăng mă hĕ hmôk ti êngao.

 Amai H’Lyna Niê, Ƀuôn Sah B, să Ea Tul, kdriêk Čư̆ M’Gar, čar Dak Lak brei thâo, mơ̆ng đưm đă mnuih Êđê lač ana mtei mâo lu êa leh anăn mnơ̆ng tŭ jăk kơ asei mlei, mâo lu mta mnơ̆ng ƀơ̆ng jăk mơ̆ng mtei juê msĕ si djam kpŭng, tŭk hŏng trŏng phĭ, ƀơ̆ng mtah…Bi djam mtei juê lŭk hŏng čĭm mnŭ dưi dlăng jing sa mta mnơ̆ng ƀơ̆ng jăk mơ̆ng ƀuôn sang.

“Djam mtei juê lŭk mâo djăp mta mnơ̆ng ƀi mƀăt kơh jăk. Čĭm mnŭ tŭk bi ksă, bi kơiăng mnŭ mă kđeh leh anăn kčoh bi lik. Leh anăn kpit jih êa ana mtei. Knhal tuč tlê amrêč dưm hra, kpŭng bi ƀăt, êsŭn, djam ƀâo. Djam anei jăk snăk.”

 Djam anei huă hŏng asei hlơr, amâodah ƀơ̆ng hjăn. Mta mmih mơ̆ng ana mtei hŏng mnâo hăng mơ̆ng amrêč. Djam mtei juê lŭk hŏng čĭm mnŭ mnuih Êđê mdê hŏng djam ana mtei lŭk hŏng čĭm mnŭ ti dŭm krĭng kwar kyua mâo thiăm mnâo ƀâo mngưi mơ̆ng djam ƀâo, êsŭn leh anăn êtăk lăn ba kơ arăng klei khăp ƀơ̆ng. Wăt tơdah klei hdĭp mâo lu klei bi mlih, mâo lu mta mrâo hlăm mnơ̆ng ƀơ̆ng êpul êya anak Êđê. Ƀiădah mta djam mtei juê bi lŭk hŏng čĭm mnŭ ăt jiă kma, jing mnơ̆ng mâo lu gŏ sang Êđê khăp ƀơ̆ng.

Amai H’Lyna Niê, Ƀuôn Sah B, să Ea Tul, kdriêk Čư̆ M’Gar, čar Dak Lak brei thâo, ară anei lu gŏ sang lŏ pla mtei juê hlăm war sang čiăng mkra mjing djam ƀơ̆ng kơ gŏ sang. Anei jing mta djam mâo nanao hlăm hruê mơak gŏ sang leh anăn ƀuôn sang kyua mta pioh mkra mâo leh, ênưih leh anăn tŭ jăk.

“Djam anei amâo dưi kƀah ôh hlăm ƀuôn sang. Grăp boh sang mâo klei mơak amâodah mâo tuê, ayŏng adei hriê čhưn ti sang. Khăng čuh mnŭ bi êdah klei khăp kơ tue. Hlăk anăn jơ̆ng mnŭ, kơiăng mnŭ khăng tŭk djam mdê mdê, amâo lui mang ôh. Tơdah ngă djam anei mă jih klang snăn mduôn, hđeh dưi ƀơ̆ng sơăi.”

Djam mtei juê lŭk hŏng čĭm mnŭ mnuih Êđê ênưih mkra mjing leh anăn jăk msĕ si anak mnuih hlăm ƀuôn sang ba kơ grăp čô tuôm lông ƀơ̆ng leh srăng hdơr nanao./.